کراچی کے مختلف علاقوں میں وقفے وقفے سے ہلکی اور تیز بارش کا سلسلہ جاری ہے۔ شہر میں مسلسل 2 گھنٹے سے بارش ہونے کے باعث سڑکیں تالاب بن گئیں۔
بارش کے باعث مختلف نجی اور سرکاری تقریبات منسوخ کر دی گئیں جبکہ قائد آباد اور گلشن حدید فیز ون میں بارش کا پانی گھروں میں داخل ہو گیا۔
کراچی کے علاقے شارع فیصل، ایئرپورٹ، ماڈل کالونی اور لانڈھی کے اطراف میں بارش ہوئی۔
اس کے علاوہ آئی آئی چندریگر روڈ، ڈیفنس، گلستان جوہر، ناظم آباد اور اطراف میں بھی بادل برسے ہیں۔
کراچی میں موسلا دھار بارش کے بعد مختلف مقامات پر پانی جمع ہو گیا۔
گلشن اقبال، لیاقت آباد، صدر، فیڈرل بی ایریا، نارتھ کراچی سمیت دیگر مقامات پر پانی جمع ہے۔
’ بادل شہر کے اوپر مزید بن رہے ہیں‘
موسمیاتی تجزیہ کار جواد میمن نے کہا ہے کہ بادل شہر کے اوپر مزید بن رہے ہیں، مزید ایک گھنٹہ یا اس سے زائدبارش جاری رہ سکتی ہے، سپرہائی وے کے اطراف سے بادل شہر کی جانب آرہے ہیں۔
جواد میمن کا کہنا تھا کہ کلفٹن میں بارش گرنے کی رفتار 60 ملی میٹر فی گھنٹہ ہے، کلفٹن میں صبح سے اب تک 70 ملی میٹر تک بارش ہو چکی ہے۔
