مون سون کے اثرات کے باعث ہونے والی شدید بارشوں کے بعد راول ڈیم میں پانی کی سطح بڑھنے پر اسپل ویز کھول دیے گئے ہیں۔ ڈیم میں پانی کی سطح 1,751 فٹ تک پہنچنے پر اسپل ویز کھولنے کا فیصلہ کیا گیا۔
اسسٹنٹ کمشنر نیلور اس عمل کی نگرانی کر رہے ہیں تاکہ پانی کے اخراج کو محفوظ طریقے سے کنٹرول کیا جا سکے۔
ضلعی انتظامیہ کے مطابق ریسکیو ٹیمیں، پولیس اور ایمبولینس مختلف اہم مقامات پر تعینات ہیں اور تمام اداروں کو ہنگامی حالات سے نمٹنے کے لیے احتیاطی اقدامات کرنے کی ہدایت کی گئی ہے۔
شہریوں سے اپیل کی گئی ہے کہ وہ ندی نالوں کے قریب نہ جائیں اور پانی کے بڑھنے کی صورت میں نالوں یا عارضی پلوں کو عبور کرنے سے گریز کریں۔
این ڈی ایم اے نے بھی کہا ہے کہ راول ڈیم کے اسپل ویز کھلنے کے بعد کورنگ نالہ میں پانی کے بہاؤ میں اضافہ متوقع ہے، لہٰذا ملحقہ رہائشی علاقوں کے مکین محتاط رہیں۔
