مون سون کا سب سے طاقتور اسپیل ملک کے مختلف حصوں میں تباہی پھیلانے کے بعد اب پنجاب کے لیے بھی خطرے کی گھنٹی بن گیا ہے۔ پروونشل ڈیزاسٹر مینجمنٹ اتھارٹی (پی ڈی ایم اے) پنجاب نے آئندہ 24 گھنٹوں کے دوران شدید بارشوں کی پیش گوئی کرتے ہوئے خبردار کیا ہے کہ بالائی پنجاب میں طوفانی بارشوں کے ساتھ کلاؤڈ برسٹنگ کا بھی امکان موجود ہے۔
ترجمان پی ڈی ایم اے کے مطابق یہ مون سون کا ساتواں اور سب سے زیادہ شدید اسپیل ہے، جس کے تحت کئی اضلاع میں موسلادھار بارشوں کا سامنا ہوسکتا ہے۔
یاد رہے کہ خیبرپختونخوا پہلے ہی سیلابی صورتحال سے بدترین تباہی جھیل رہا ہے، جہاں ہلاکتوں کی تعداد 320 سے تجاوز کرچکی ہے۔ بونیر میں سب سے زیادہ نقصان ہوا جہاں 150 سے زائد افراد جاں بحق ہوئے۔ باجوڑ میں کلاؤڈ برسٹ کے بعد آنے والے سیلابی ریلوں نے کئی بستیاں اجاڑ دیں، مکانات منہدم ہوگئے، جبکہ مال مویشی اور گاڑیاں بھی پانی کے بہاؤ میں بہہ گئیں۔
ادھر بونیر میں ہنگامی حالت نافذ کر دی گئی ہے۔ دوسری جانب کے پی حکومت کا ایک ہیلی کاپٹر جو ریلیف آپریشن میں مصروف تھا، حادثے کا شکار ہوگیا اور اس میں سوار 5 اہلکار شہید ہوگئے۔
