گلگت بلتستان کے ضلع استور میں اللہ والی جھیل کے قریب شدید سیلابی ریلے نے تباہی مچا دی۔ پہاڑوں سے اترنے والے بڑے بڑے پتھر پانی کے ساتھ بہہ کر آبادی تک پہنچ گئے، جس سے کئی مکانات، زرعی زمینیں اور فصلیں شدید متاثر ہوئیں۔ ایک مکان تو مکمل طور پر سیلاب میں بہہ گیا۔
گلگت بلتستان کے وزیر داخلہ کے مطابق حالیہ سیلاب سے علاقے میں سات افراد جاں بحق اور گیارہ زخمی ہوئے، جبکہ چار افراد تاحال لاپتہ ہیں۔ نلتر ایکسپریس وے کا بڑا حصہ سیلاب کے باعث بہہ گیا اور نلتر ویلی میں متعدد سیاح پھنس گئے۔
مزید برآں، نلتر میں تین بجلی گھر بند کر دیے گئے، اسکردو میں شاہراہِ بلتستان پر باغیچہ آر سی سی پل بہہ گیا، اور لینڈ سلائیڈنگ کے باعث کئی مقامات پر سڑکیں بند ہیں۔ گانچھے میں سرمو پل اور ضلع شگر میں تین رابطہ پل بھی پانی میں بہہ گئے۔
سیلابی صورتحال کے نتیجے میں 320 مکانات مکمل طور پر تباہ جبکہ تقریباً 700 کو جزوی نقصان پہنچا ہے۔
