بھارت کی طرف سے دریائے ستلج میں پانی چھوڑنے کے بعد ضلع بہاولنگر میں نچلے درجے کا سیلاب آ گیا جس کے نتیجے میں دریائی بیلٹ کے علاقے میں فصلیں اور ڈیرے پانی میں ڈوب گئے۔ اطلاعات کے مطابق بھارتی جانب سے آنے والا بڑا سیلابی ریلہ پاکستانی حدود میں داخل ہوا، جس کی وجہ سے گنڈا سنگھ والا کے مقام پر پانی کا اخراج 70 ہزار کیوسک تک پہنچ گیا۔
سیلاب سے قصور میں سیکڑوں ایکڑ فصلیں تباہ ہو گئیں جبکہ متعدد آبادیاں متاثر ہوئیں اور مقامی لوگ نقل مکانی پر مجبور ہیں۔ ضلعی انتظامیہ نے دفعہ 144 نافذ کر کے ہنگامی وارننگ جاری کی اور دریائی بیلٹ کے رہائشیوں کو فوری انخلا کی ہدایت کی۔ ریسکیو 1122 نے متاثرہ علاقوں میں کشتی سروس کا آغاز کیا جبکہ متاثرہ خاندانوں کو دو وقت کا کھانا اور مویشیوں کے لیے چارہ فراہم کیا جا رہا ہے۔ ضلعی انتظامیہ اور پی ڈی ایم اے ہنگامی صورتحال سے نمٹنے کے لیے چوکس ہیں۔
ڈپٹی کمشنر قصور کے مطابق متاثرین کی مدد اور حفاظتی اقدامات یقینی بنائے جا رہے ہیں۔ تلوار پوسٹ پر ریسکیو، پولیس، ریونیو اور محکمہ انہار کے کیمپ بھی قائم کیے گئے ہیں تاکہ امدادی سرگرمیوں کو مؤثر بنایا جا سکے۔
دوسری جانب، پی ڈی ایم اے پنجاب نے مون سون فلڈ کی صورتحال سے متعلق فیکٹ شیٹ جاری کی ہے اور بتایا ہے کہ بالائی پنجاب میں طوفانی بارشوں اور کلاڈ برسٹنگ کے خدشات ہیں۔ گزشتہ 24 گھنٹوں میں مری، راولپنڈی، سیالکوٹ اور بہاولپور میں بارشیں ریکارڈ کی گئی ہیں۔
ترجمان پی ڈی ایم اے کے مطابق آئندہ 24 گھنٹوں میں پنجاب کے بیشتر اضلاع میں شدید بارش کی پیشگوئی ہے، خاص طور پر بالائی پنجاب کے اضلاع میں طوفانی بارشوں کا خطرہ ہے۔ ڈی جی پی ڈی ایم اے عرفان علی کاٹھیا نے انتظامیہ کو ہائی الرٹ رہنے کی ہدایات جاری کی ہیں اور کہا کہ خطرے کے زیادہ متاثرہ اضلاع میں خصوصی اقدامات کیے جا رہے ہیں۔
دریائے سندھ میں تربیلا اور تونسہ کے مقام پر نچلے درجے کی سیلابی صورتحال ہے، جبکہ کالاباغ اور چشمہ میں درمیانے درجے کا سیلاب ہے۔ دریائے ستلج میں گنڈا سنگھ والا کے مقام پر بھی نچلے درجے کا سیلاب موجود ہے۔ دریائے چناب، جہلم اور راوی میں پانی کا بہاؤ معمول کے مطابق ہے اور ندی نالوں میں بھی پانی کا بہاؤ نارمل ہے۔
انہوں نے بتایا کہ تربیلا ڈیم 98 فیصد اور منگلا ڈیم 68 فیصد تک بھر چکا ہے، جبکہ بھارتی ڈیمز میں پانی کی سطح 70 فیصد تک ہے۔ ڈی جی پی ڈی ایم اے نے شہریوں سے درخواست کی ہے کہ موسم برسات کے دوران احتیاطی اقدامات اختیار کریں۔
