یومِ آزادی کے موقع پر پاکستانی اداکارہ عائزہ خان کا فوٹو شوٹ شہزادی ڈیانا کے مخصوص انداز سے متاثر ہونے کے باعث سوشل میڈیا صارفین کی تنقید کی زد میں آ گیا۔
اداکارہ نے انسٹاگرام پر یومِ آزادی کے موقع پر کروائے گئے فوٹو شوٹ کی تصاویر شیئر کیں، جن میں وہ سبز و سفید لباس میں نظر آئیں، جو لیڈی ڈیانا کے مشہور انداز سے متاثر دکھائی دیا۔
عائزہ خان عام طور پر تہواروں اور خصوصی مواقع کے لیے اپنے فوٹو شوٹس سوشل میڈیا پر شیئر کرتی ہیں اور ان کے فیشن سینس کو صارفین عموماً سراہتے ہیں، لیکن اس بار یہ پوسٹ ان کے لیے تنقید کا سبب بن گئی۔
کئی صارفین نے اداکارہ پر شدید ردعمل دیا، ایک صارف نے لکھا، “یہ یومِ آزادی ہے، اگر کسی کو کاپی کرنا تھا تو فاطمہ جناح کا اسٹائل اپنانا چاہیے تھا، یہ یومِ غلامی نہیں۔” ایک اور صارف نے کہا، “جن سے آزادی حاصل کی، اُن ہی کا انداز ری کریٹ کر لیا، یہ اداکار بھی ناں۔”
کچھ صارفین نے اس عمل کو شرمندگی کے مترادف قرار دیا اور کہا کہ پاکستان کے یومِ آزادی کے موقع پر برٹش رائلز کے انداز کو اپنانا مناسب نہیں تھا۔
