اقوام متحدہ کے پناہ گزینوں سے متعلق ادارے (یو این ایچ سی آر) نے بتایا ہے کہ اٹلی کے جنوبی جزیرے لیمپیڈوسا کے قریب کشتی ڈوبنے کے نتیجے میں 27 تارکین وطن اور پناہ گزین اپنی جان سے ہاتھ دھو بیٹھے۔
یو این ایچ سی آر کے مطابق اس سانحے میں بچ جانے والے 60 افراد کو فوری امداد اور ضروری سہولیات فراہم کی جا رہی ہیں۔ اٹلی کی کوسٹ گارڈ نے خدشہ ظاہر کیا ہے کہ ہلاکتوں کی تعداد موجودہ اندازے سے زیادہ ہو سکتی ہے۔
مقامی میڈیا رپورٹس کے مطابق کشتی میں سوار افراد لیبیا سے روانہ ہوئے تھے اور ان کا ہدف اٹلی پہنچنا تھا۔
افریقہ کے ساحلی علاقوں سے اٹلی کا رخ کرنے والے پناہ گزین اور تارکین وطن عموماً پرانی اور خستہ کشتیوں میں سفر کرتے ہیں جن میں ضرورت سے کہیں زیادہ لوگوں کو سوار کیا جاتا ہے۔
ان مسافروں کو انسانی اسمگلر بحیرہ روم کے نہایت خطرناک سمندری راستے سے یورپ کی طرف روانہ کرتے ہیں، اور اکثر ان کا پہلا پڑاؤ لیمپیڈوسا ہی ہوتا ہے۔
