بونیر، آزاد کشمیر اور گلگت بلتستان میں شدید بارشیں، کلاؤڈ برسٹ اور سیلابی ریلے نے تباہی مچادی، مختلف واقعات میں مجموعی طور پر 79 افراد ہلاک، درجنوں زخمی اور سینکڑوں لاپتہ ہیں۔ پی ڈی ایم اے کے مطابق حالیہ بارشوں، لینڈ سلائیڈنگ اور کلاؤڈ برسٹ کے باعث جانی و مالی نقصان وسیع پیمانے پر ہوا۔
خیبرپختونخوا کے اضلاع بٹگرام، باجوڑ اور مانسہرہ میں بادل پھٹنے، سیلابی ریلے اور لینڈ سلائیڈنگ کے نتیجے میں 60 افراد ہلاک، 16 زخمی اور متعدد لاپتہ ہوئے۔ پی ڈی ایم اے کے مطابق ہلاک ہونے والوں میں 40 مرد، 12 بچے اور 8 خواتین شامل ہیں جبکہ زخمیوں میں 13 مرد، 2 خواتین اور ایک بچہ شامل ہے۔ بارشوں اور فلش فلڈ کے سبب 35 مکانات کو نقصان پہنچا، جن میں 7 مکانات مکمل اور 28 جزوی طور پر تباہ ہوئے۔
پی ڈی ایم اے کے مطابق حادثات باجوڑ، بٹگرام، تورغر، مانسہرہ، سوات، بونیر اور شانگلہ میں پیش آئے، سب سے زیادہ نقصان ضلع باجوڑ اور بٹگرام میں ہوا، جہاں ریسکیو آپریشن تاحال جاری ہیں۔
دوسری جانب ڈپٹی کمشنر بونیر نے بتایا کہ بونیر کے علاقوں گوکند اور پیربابا میں سیلابی ریلے نے شدید تباہی مچادی، بارشوں اور سیلاب کے نتیجے میں 50 افراد جان کی بازی ہار گئے ہیں۔ ڈپٹی کمشنر کاشف قیوم کے مطابق 40 افراد کی لاشیں ٹی ایچ کیو پیربابا میں اور 10 افراد کی لاشیں ڈی ایچ کیو ڈگر میں رکھی گئی ہیں۔ ضلع بھر میں ایمرجنسی نافذ کر دی گئی ہے۔
