تھانہ دھمیال کی حدود میں واقع گرجا کے علاقے میں ایک خاتون، جو مبینہ طور پر اپنے شوہر کے تشدد کا شکار ہوئی تھی، کی خاموشی سے تدفین کی کوشش ناکام بنا دی گئی۔ پولیس کے مطابق لواحقین نے لاش پر تشدد کے نشانات دیکھ کر اسے کوٹ ادھو سے واپس راولپنڈی منتقل کیا۔ اطلاع ملنے پر پولیس نے خاتون کے شوہر کو گرفتار کر لیا اور پوسٹ مارٹم کروا کر قانونی کارروائی کا آغاز کر دیا۔
پولیس حکام کے مطابق، 10 اگست کو مسماتہ ثمینہ کو خاوند اور بیٹے نے اسپتال منتقل کیا اور دعویٰ کیا کہ وہ سیڑھیوں سے گر کر زخمی ہوئی۔ 14 اگست کو ثمینہ دم توڑ گئی اور لواحقین نے لاش کو تابوت میں رکھ کر خاموشی سے کوٹ ادھو لے جانے کی کوشش کی۔ تاہم، خاتون کے رشتہ داروں کو شک ہوا اور غسل کے دوران جسم پر تشدد کے آثار دیکھ کر لاش دوبارہ راولپنڈی منتقل کر دی گئی اور پولیس کو اطلاع دی گئی۔
واقعہ پر سی پی او راولپنڈی خالد ہمدانی نے فوری نوٹس لیا۔ دھمیال پولیس نے پوسٹ مارٹم کروا کر مقدمہ درج کر دیا ہے۔
یہ واقعہ کچھ دن قبل فیروزوالا اور بہاولپور میں مبینہ سسرالی تشدد کے باعث دو خواتین کی ہلاکتوں سے بھی متعلق ہے۔ بہاولپور میں بہو کو شک کی بنیاد پر قتل کیا گیا، جبکہ فیروزوالا کے تھانہ فیکٹری ایریا کے علاقہ میاں کالونی ڈوگر چوک میں شوہر نے بیوی کو تشدد کر کے موت کے گھاٹ اتار دیا۔
لواحقین کے مطابق، 22 سالہ انعم، جو دو بچوں کی ماں تھی، کو شوہر نے چار دن قبل صلح کے بہانے گھر لے گیا تھا۔ سسرالیوں نے اہل خانہ کو بتایا کہ خاتون کی موت قدرتی تھی، لیکن جب اہل خانہ نے جسم کا معائنہ کیا تو تشدد کے نشانات سامنے آئے۔ پولیس کی بھاری نفری 15 پر کال کے بعد موقع پر پہنچی اور لاش کو پوسٹ مارٹم کے لیے ہسپتال منتقل کیا گیا۔
