باجوڑ میں آسمانی بجلی گرنے اور کلاؤڈ برسٹ کے باعث آنے والے تباہ کن سیلابی ریلے نے بڑے پیمانے پر نقصان پہنچایا، جس کے نتیجے میں 8 افراد جان کی بازی ہار گئے، جبکہ متعدد مکانات شدید متاثر ہوئے۔ میڈیا رپورٹس کے مطابق خیبر پختونخوا کے ضلع باجوڑ کی تحصیل سلارزئی میں اچانک آنے والے پانی کے طوفان نے 4 افراد کو زخمی اور 17 کو لاپتہ کر دیا۔ ڈسٹرکٹ ایمرجنسی آفیسر امجد خان کی نگرانی میں ریسکیو ٹیمیں سرچ اور ریسکیو آپریشن میں مصروف ہیں۔
علاقے میں پانی کی سطح خطرناک حد تک بڑھنے کے باعث راستے بند ہو گئے ہیں، جس سے امدادی کاموں میں مشکلات پیش آ رہی ہیں۔ مقامی لوگ اپنی مدد آپ کے تحت متاثرین کو محفوظ مقامات پر منتقل کرنے کی کوشش کر رہے ہیں۔
ادھر لوئر دیر میں بھی رات بھر جاری بارش نے تباہی مچائی۔ سوری پاؤ کے علاقے میں ایک مکان کی چھت گرنے سے ہلاکتوں کی تعداد 5 ہو گئی، جن میں خواتین اور بچے شامل ہیں اور سب کا تعلق ایک ہی خاندان سے تھا۔ اس واقعے میں دو افراد زخمی ہوئے جنہیں تیمورگرہ اسپتال منتقل کیا گیا۔
ریسکیو حکام کے مطابق حادثہ رات گئے بارش کے باعث پیش آیا، جس میں 7 افراد ملبے تلے دب گئے تھے۔ بارش اور ندی نالوں میں طغیانی کے باعث کئی رابطہ سڑکیں بند ہو گئیں، جبکہ اوڈیگرام کا رابطہ پل بھی شدید متاثر ہوا، جس سے ٹریفک معطل ہو گئی۔ تاہم، سیلابی پانی میں پھنسے 25 سیاحوں کو رات گئے کامیابی سے ریسکیو کر لیا گیا۔
