پاکستان کے 78ویں یومِ آزادی کے موقع پر دنیا کی بلند ترین عمارت برج خلیفہ بھی سبز ہلالی پرچم کے رنگ میں جگمگا اُٹھی۔
متحدہ عرب امارات کے شہر دبئی میں بھی یومِ آزادی کا جشن بھرپور انداز میں منایا گیا۔ پاکستانی شہری پرجوش نظر آئے جب قومی ترانے کی دھن کے ساتھ برج خلیفہ پر پاکستانی پرچم لہراتا دکھائی دیا۔
اس موقع پر بڑی تعداد میں پاکستانی عمارت کے اطراف جمع ہوئے اور وطن سے محبت کا بھرپور اظہار کیا۔ اسی طرح برمنگھم میں ایک لائبریری بھی سبز اور سفید روشنیوں سے منور کی گئی۔
دبئی میں Emirates Loves Pakistan کی تقریب بھی سجائی گئی، جس میں 60 ہزار سے زائد افراد نے شرکت کی۔ امارات کے وزیر برائے رواداری و ہم آہنگی، شیخ نہیان بن مبارک النہیان نے بھی خصوصی طور پر تقریب میں شرکت کی اور اس دن کی اہمیت پر خوشی اور فخر کا اظہار کیا۔ پاکستانی سفیر فیصل نیاز ترمذی بھی تقریب میں موجود تھے۔
تقریب میں پاکستانی ثقافت کی بھرپور نمائش کی گئی، جس میں روایتی موسیقی، رقص اور دستکاری کے نمونے خاص طور پر توجہ کا مرکز رہے۔
