اپنے والد کے انتقال کے غم کے باوجود، پاکستان کے معروف گلوکار عاطف اسلم نے گزشتہ روز کراچی کے نیشنل اسٹیڈیم میں ہونے والے کنسرٹ میں بہترین پرفارمنس دی اور مداحوں کے دل جیت لیے۔
یہ کنسرٹ سندھ حکومت کے زیر اہتمام بھارت کی شکست اور پاکستان کے یومِ آزادی کے جشن کے موقع پر منعقد کیا گیا تھا، جس میں ملک کی معروف شخصیات نے اپنی فنکارانہ صلاحیتیں پیش کیں۔
کراچی آرٹس کونسل کے اس پروگرام میں عاطف اسلم کے علاوہ راحت فتح علی خان، سجاد علی، حدیقہ کیانی، کیفی خلیل، خماریاں اور طفیل سنجرانی نے بھی شائقین کو محظوظ کیا۔
والد کی وفات کے باوجود عاطف اسلم نے اپنی پیشہ ورانہ ذمہ داری کو اولین ترجیح دیتے ہوئے بھرپور اور متاثر کن پرفارمنس دی۔ مداح حیران تھے کہ اسلم کے چہرے پر غم کا اثر دکھائی نہیں دیا اور انہوں نے گلوکار کو زبردست داد دی۔ شائقین نے انہیں سچا ہیرو قرار دیا۔
تقریب کا اختتام کیک کاٹنے اور شاندار آتش بازی کے ساتھ ہوا، جس نے محفل کو یادگار بنا دیا۔
