جشنِ آزادی کے موقع پر ریلیز ہونے والی فلم ویلکم ٹو پنجاب کا شاندار پریمیئر لاہور کے ایک مقامی سینما میں منعقد ہوا، جس میں شوبز انڈسٹری کے معروف فنکاروں نے بھرپور شرکت کی۔
اس موقع پر فلم کی مرکزی کاسٹ عادی خان، زارا حیات، افتخار ٹھاکر، قیصر پیا، خاور خان، شاہزیب مرزا، اچھی خان، ممتاز بیگم سمیت سینئر شخصیات سید نور، صفدر ملک، پرویز کلیم، مسعود بٹ، میرا، لیلیٰ، سہیل ملک، التمش بٹ، شاہد رانا، جاوید رضا، ذیڈ اے زلفی، فریحہ جبیں، سوہانا راجپوت، طلعت شاہ، صدف راجپوت، ممتاز شبیر اور فاروق بٹ شریک ہوئے۔
تقریب کے دوران میڈیا سے گفتگو میں ڈائریکٹر سید نور نے شہزاد رفیق اور صفدر ملک کو ایک معیاری فلم بنانے پر مبارکباد دی۔ فلم کے ہدایتکار شہزاد رفیق نے بتایا کہ کہانی انہوں نے خود لکھی ہے، جس میں بین الصوبائی ہم آہنگی کو اجاگر کیا گیا ہے۔ ان کا کہنا تھا کہ پروڈیوسر صفدر ملک نے ان پر اعتماد کیا اور کاسٹ نے بھی شاندار کام کیا۔
شہزاد رفیق کا مزید کہنا تھا کہ فلم مکمل کر دی گئی ہے، اب فیصلہ فلم بینوں کے ہاتھ میں ہے کہ وہ سینما آ کر اس کا لطف اٹھائیں۔ یہ ایک میڈ اِن پاکستان فلم ہے جو اعلیٰ معیار کے ساتھ بنائی گئی ہے۔
پروڈیوسر صفدر ملک نے بھی شہزاد رفیق کی محنت کو سراہا اور بتایا کہ کاسٹ میں جاوید شیخ، بشریٰ انصاری، ساجد حسن، فردوس جمال، یاسر نواز، عدنان صدیقی اور گوشی خان سمیت سب نے بھرپور محنت کی ہے۔ ممتاز بیگم کے مطابق ویلکم ٹو پنجاب ایک معیاری اور شاندار فلم ہے۔
