پنجاب میں آج سے مون سون بارشوں کا ساتواں اسپیل شروع ہونے کا امکان ہے۔
پی ڈی ایم اے پنجاب کے ترجمان کے مطابق یہ اسپیل گزشتہ اسپیلوں کی نسبت زیادہ شدید اور مضبوط ہوگا۔
ترجمان نے بتایا کہ پنجاب کے پہاڑی علاقوں میں 13 سے 17 اگست کے دوران مون سون بارشیں متوقع ہیں، جبکہ 18 سے 21 اگست تک میدانی علاقوں میں بھی بارش کا امکان ہے۔
لاہور، راولپنڈی، گوجرانوالہ اور سیالکوٹ میں شدید بارشوں کے باعث اربن فلڈنگ کا خدشہ ہے اور دریاؤں سے متصل ندی نالوں میں اچانک سیلاب (فلیش فلڈنگ) کے امکانات بھی موجود ہیں۔
ڈی جی پی ڈی ایم اے پنجاب عرفان علی کاٹھیا نے کہا کہ مری اور گلیات میں لینڈ سلائیڈنگ کا بھی خطرہ ہے اور کچے مکانات اور کمزور عمارتیں نقصان کا شکار ہو سکتی ہیں۔
