یوکے ہیلتھ سیکیورٹی ایجنسی نے انگلینڈ میں شدید گرمی کی لہر کے پیش نظر خبردار کرتے ہوئے کہا ہے کہ درجہ حرارت 30 ڈگری سینٹی گریڈ تک جا سکتا ہے۔
امبر ہیٹ ہیلتھ وارننگ میں بتایا گیا ہے کہ گرمی کے اثرات انگلینڈ کے مختلف حصوں میں محسوس کیے جا سکتے ہیں۔
ایسٹ مڈلینڈز، ویسٹ مڈلینڈز، مشرقی انگلینڈ، لندن اور جنوب مشرقی علاقوں میں آج صبح 9 بجے سے شام 6 بجے تک امبر وارننگ نافذ رہے گی، جبکہ جنوب مغرب، یارکشائر، ہمبر، شمال مغرب اور شمال مشرق میں اسی وقت کے دوران ییلو وارننگ جاری کی گئی ہے۔
حکام کے مطابق گرمی کے باعث صحت اور سماجی نگہداشت کی سہولیات متاثر ہو سکتی ہیں، جبکہ 65 سال یا اس سے زائد عمر کے افراد کو خصوصی احتیاط کرنے کا مشورہ دیا گیا ہے۔
فی الحال برطانیہ کے بیشتر علاقوں میں درجہ حرارت 25 ڈگری سینٹی گریڈ ریکارڈ کیا جا رہا ہے، جبکہ اس سے قبل یکم جولائی کو 34.7 ڈگری سینٹی گریڈ کے ساتھ سال کا سب سے گرم دن ریکارڈ کیا گیا تھا۔
