بالائی علاقوں میں جاری بارشوں کی وجہ سے پنجاب کے مختلف دریاؤں میں طغیانی کا خطرہ بڑھ گیا ہے۔ پی ڈی ایم اے کے ترجمان کے مطابق، آئندہ دو روز کے دوران بھارت کی جانب سے دریائے ستلج میں پانی جاری کیے جانے کا امکان ہے، کیونکہ بھارتی ڈیمز میں پانی کی سطح غیر معمولی حد تک بڑھ چکی ہے۔ خاص طور پر بھاکڑا ڈیم 61 فیصد، پونگ ڈیم 76 فیصد اور تھین ڈیم 64 فیصد تک بھر چکے ہیں۔
پی ڈی ایم اے، ارسا اور محکمہ آبپاشی مل کر چوبیس گھنٹے ان دریاؤں اور ڈیمز کی نگرانی کر رہے ہیں۔ دریائے ستلج کے گنڈا سنگھ والا مقام پر سیلاب کا درجہ نچلے سطح سے معمول پر آ چکا ہے، تاہم اس میں مزید اضافے کا خدشہ موجود ہے۔ اسی طرح دریائے چناب کے بیراجز مرالہ، خانکی اور قادر آباد کے علاقوں میں درمیانے سے شدید سطح کے سیلاب کی وارننگ جاری کی گئی ہے۔
ڈی جی پی ڈی ایم اے عرفان کاٹھیا نے کمشنرز، ڈپٹی کمشنرز اور متعلقہ محکموں کو ہائی الرٹ رہنے کی ہدایت کی ہے۔ انہوں نے عوام سے کہا ہے کہ دریا کے کنارے رہنے والے فوری طور پر محفوظ مقامات پر منتقل ہو جائیں اور ہنگامی انخلا کی صورت میں حکومتی انتظامات میں تعاون کریں۔ شہریوں کو مشورہ دیا گیا ہے کہ احتیاطی تدابیر اپنائیں، دریاؤں، نہروں اور تالابوں میں نہ نہائیں اور سیلابی علاقوں میں پکنک یا غیر ضروری آمدورفت سے گریز کریں۔ بچوں کو بھی دریاؤں کے قریب جانے سے منع کیا گیا ہے۔
ڈی جی پی ڈی ایم اے نے مزید کہا کہ کسی بھی ہنگامی صورتحال میں شہری پی ڈی ایم اے پنجاب کی ہیلپ لائن 1129 پر رابطہ کریں۔ پی ڈی ایم اے پنجاب شہریوں کی جان و مال کے تحفظ کو یقینی بنانے کے لیے ہر ممکن اقدامات کر رہا ہے۔
