خیبر پختونخوا حکومت نے سیاحتی مقامات پر ایمرجنسی رسپانس کے نظام کو مزید مؤثر بنانے کے لیے ایک اہم قدم اٹھایا ہے، جس کے تحت گلیات ڈویلپمنٹ اتھارٹی اور کاغان ڈویلپمنٹ اتھارٹی کو جدید ملٹی پرپز مشینیں فراہم کی گئی ہیں۔ وزیراعلیٰ خیبر پختونخوا علی امین خان گنڈاپور نے یہ جدید مشینیں دونوں اتھارٹیز کے حوالے کر دیں۔
بریفنگ میں بتایا گیا کہ یہ مشینیں ملک میں اپنی نوعیت کی پہلی ہیں، جو برفباری کے دوران سڑکوں کو مسلسل آمدورفت کے قابل رکھنے میں مددگار ثابت ہوں گی۔ یہ ہائی پرفارمنس مشینیں سخت اور مشکل موسمی حالات میں بھی تیز اور مؤثر کام کرنے کی اہلیت رکھتی ہیں۔
یہ مشینیں نہ صرف برف اور گلیشیئر کو فوری طور پر صاف کرنے کی صلاحیت رکھتی ہیں بلکہ گرنے والے درخت، کنکریٹ کا ملبہ، لوہے کی رکاوٹیں کاٹنے سمیت سات مختلف کام سرانجام دے سکتی ہیں۔ انہیں عالمی بینک کے تعاون سے چلنے والے “کائٹ” پروگرام کے تحت خریدا گیا ہے، جب کہ مزید چار مشینوں کی خریداری بھی جاری ہے۔
وزیراعلیٰ کا کہنا تھا کہ صوبائی حکومت شراکت دار اداروں کے ساتھ مل کر سیاحتی مقامات کو محفوظ، قابلِ رسائی اور مزید پرکشش بنانے کے لیے عملی اقدامات کر رہی ہے۔ ان مشینوں کی بدولت سردیوں میں بھی سیاحوں کی آمدورفت ممکن ہوگی اور کسی بھی ہنگامی صورت حال میں مقامی آبادی اور سیاحوں کی جانیں بچائی جا سکیں گی۔ انہوں نے عالمی بینک کی معاونت پر شکریہ بھی ادا کیا۔
ان کے مطابق، سیاحوں کی حفاظت اور سیاحتی علاقوں تک ہر وقت رسائی سیاحت کے فروغ کے لیے نہایت ضروری ہے۔ حکومت سال بھر سیاحتی سرگرمیوں کے تسلسل کے لیے رابطہ سڑکوں کی تعمیر، موجودہ انفراسٹرکچر میں بہتری اور نئے سیاحتی زونز کی ترقی پر کام کر رہی ہے۔
مزید برآں، “میزبان ہوم اسٹے ٹورازم” منصوبہ صوبائی حکومت کا ایک منفرد اقدام ہے، جس کے ذریعے سیاحوں کو معیاری قیام کے مواقع ملیں گے اور مقامی آبادی کے لیے روزگار کے نئے دروازے کھلیں گے۔ ایمرجنسی رسپانس اور سیاحتی ڈھانچے میں یہ سرمایہ کاری صوبے کی معیشت کو مستحکم کرنے اور سیاحت کو پائیدار بنیادوں پر فروغ دینے کے وژن کا حصہ ہے۔ تقریب میں صوبائی کابینہ کے ارکان اور متعلقہ اداروں کے حکام نے بھی شرکت کی۔
