پنجاب ڈیزاسٹر مینجمنٹ اتھارٹی (پی ڈی ایم اے) نے بدھ سے شروع ہونے والی مون سون بارشوں کے اگلے دور کی پیش گوئی کرتے ہوئے سیلابی صورتحال کے حوالے سے وارننگ جاری کر دی ہے۔ ترجمان کے مطابق دریائے ستلج، راوی، چناب، جہلم اور ان سے جڑے ندی نالوں میں ممکنہ سیلاب کا خدشہ ظاہر کیا گیا ہے۔ مون سون کے ساتویں مرحلے کے باعث پانی کی سطح خطرناک حد تک بڑھنے کا امکان ہے جو 13 اگست سے شروع ہوگا۔
صوبے کے تمام کمشنرز، ڈپٹی کمشنرز اور متعلقہ محکموں کو الرٹ کر دیا گیا ہے۔ محکمہ لوکل گورنمنٹ، زراعت، آبپاشی، صحت، جنگلات، مویشی پالنے اور ٹرانسپورٹ کو بھی قبل از وقت حفاظتی انتظامات مکمل کرنے کی ہدایات دی گئی ہیں۔
پی ڈی ایم اے کے ڈائریکٹر جنرل عرفان علی کاٹھیا نے کہا ہے کہ تمام متعلقہ ادارے ایمرجنسی کے لیے مکمل تیار رہیں۔ ایمرجنسی کنٹرول رومز میں عملہ چوبیس گھنٹے چوکس رکھا جائے اور ریسکیو 1122 کی ٹیمیں ہائی الرٹ پر رہیں۔ انہوں نے کہا کہ دریاﺅں کے کنارے بسنے والے شہریوں کو محفوظ مقامات پر منتقل کیا جائے اور مویشیوں کے انخلا کو بھی یقینی بنایا جائے۔
عوام سے درخواست کی گئی ہے کہ وہ جاری کردہ حفاظتی اقدامات پر سختی سے عمل کریں، دریاؤں، نہروں، ندی نالوں اور تالابوں میں نہ نہائیں اور ہنگامی صورت حال میں انتظامیہ کے تعاون کو یقینی بنائیں۔ پی ڈی ایم اے نے شہریوں کو مشورہ دیا ہے کہ وہ موسمی صورتحال کے بارے میں تازہ ترین معلومات حاصل کرنے کے لیے متعلقہ اداروں سے رابطے میں رہیں۔
