قومی ایئر لائن کے طیاروں میں فنی خرابی کے باعث بین الاقوامی فلائٹس کے شیڈول میں شدید خلل پڑا ہے اور 39 پروازیں تاخیر کا شکار ہو گئی ہیں۔
قومی ایئر لائن کے ترجمان کے مطابق پیرس میں بوئنگ 777 طیارہ خراب ہونے کی وجہ سے پروازوں کے شیڈول میں رکاوٹیں آئیں۔
ذرائع کے مطابق قومی ایئر لائن کا بوئنگ 777 طیارہ دو روز سے پیرس میں خراب حالت میں کھڑا ہے، جس کے باعث لاہور سے دبئی جانے والی دو پروازیں پی کے 203 اور پی کے 204 منسوخ کر دی گئی ہیں۔
اسلام آباد سے پیرس جانے والی قومی ایئر لائن کی پرواز 22 گھنٹے کی تاخیر کے بعد صبح 9 بجے روانہ ہوئی، جبکہ اسلام آباد سے کوالالمپور جانے والی پرواز پی کے 894 آٹھ گھنٹے لیٹ ہے۔
کراچی ایئرپورٹ پر آمد و روانگی کی 15 پروازوں میں بھی تاخیر کی اطلاع ملی ہے۔
شیڈول کے مطابق کراچی سے گوادر، تربت اور سکھر جانے والی چھ پروازوں کی روانگی میں چار گھنٹے تک تاخیر ہوئی ہے۔
کراچی سے گوادر کی پرواز پی کے 503 صبح 11 بجے روانہ ہوگی، جبکہ کراچی سے تربت کی پرواز پی کے 501 شام 4 بجے روانہ ہوگی۔
اسی طرح کراچی سے سکھر جانے والی پرواز پی کے 536 کی روانگی میں ڈیڑھ گھنٹے کی تاخیر ہوئی ہے۔ کراچی سے لاہور جانے والی پرواز پی ایف 142 کی روانگی میں چھ گھنٹے جبکہ اسلام آباد سے جدہ جانے والی پرواز 801 کی روانگی میں آٹھ گھنٹے کی تاخیر ہوئی ہے۔
