کینیڈا کے صوبے برٹش کولمبیا کے زرعی شعبے میں انقلابی تبدیلیوں کی تحریک
کھیت سے بیریز چننا زرعی سیاحت کا حصہ ہے
زرعی شعبے سے سالانہ اربوں ڈالرز کی آمدنی
مسرور احمد مسرور
برٹش کولمبیا ڈے کے موقع پر جھیلوں، باغات اور پہاڑوں سے ہٹ کر ہمیں ایک فارم ہاؤس جانے کا موقعہ ملا جو لینگلی کے علاقے میں ہی واقع ہے اور اس کا نام Krause Berry Farms ”کروز بیری فارمز“ ہے۔ یہاں ہمیں کھیت سے پہلی بار بیریز چننے کا تجربہ حاصل ہوا۔ اپنے ملک میں تو اسٹرابیریز وغیرہ پھلوں کی عام دکانوں سے خرید کر کھا لیتے ہیں لیکن اپنے ہاتھ سے کھیت میں گھومتے ہوئے بیریز چننے کا ایک الگ ہی مزہ محسوس ہوا اور ان کھیتوں میں بڑی تعداد میں دوسرے ملکوں سے اور مقامی لوگ اس ایکٹیویٹی کو پوری طرح انجوائے کر رہے تھے۔ سیاحوں کے یہاں کھیت میں آ کر بیریز کو چننا زرعی سیاحت کی ایک مثال قرار دیا جاتا ہے۔ کئی ایکڑ پر قائم یہ بیری فارم لوگوں کی دلچسپی کا مظہر دکھائی دیا۔ ہم نے سینکڑوں کی تعداد میں وہاں گاڑیاں کھڑی موجود پائیں جن سے اندازہ ہوا کہ ایک پکنک اسپاٹ کی طرح لوگوں کی بڑی تعداد یہاں آتی ہے اور یہ صوبہ برٹش کولمبیا کا صرف ایک فارم ہاؤس ہی نہیں بلکہ درجنوں ایسے فارمز ہاؤس یہاں موجود ہیں، جہاں مختلف قسم کے پھل اور سبزیاں کاشت کی جاتی ہیں۔ یہاں بلیو بیریز، کرین بیریز، چیریز اور اسٹرابیریز کی پیداوار کینیڈا کے دوسرے صوبوں کے مقابلے میں بہت زیادہ ہے۔ کروز بیری فارم میں بیریز سے تیار کردہ مختلف اشیا بھی خریدنے کے لیے رکھی جاتی ہیں۔ کھیت سے بیریز توڑنے کے لیے کچھ رقم جمع کی جاتی ہے اور انھیں ایک باسکٹ دے دی جاتی ہے کہ اس میں بیریز جمع کر سکتے ہیں۔ اس بیری فارم سے نکلنے والے کچھ اور بیری فارمز پر رکتے ہوئے آگے بڑھے جہاں بیریز اسٹالز پر خریدنے کے لیے موجود نظر آئیں۔ ان میں Maan Farms، Taves Famizy Farm اور Salt Spring Island Farm فارمز نمایاں ہیں۔
برٹش کولمبیا صوبے کی زمین اگرچہ کم ہے لیکن یہاں کی آب و ہوا زراعت کے لیے موزوں ہے یہاں فریزر ویلی اوکناگن ویلی اور وینکوور آئی لینڈ زراعت کے بڑے مراکز ہیں۔ یہاں فروٹ، سبزیاں دودھ،
پولٹری اور گرین ہاؤس کے ذریعے کاشت بہت عام ہے۔
برٹش کولمبیا بلیو بیریز، چیریز اور وائن گریپس کی پیداوار کا بڑا صوبہ مانا جاتا ہے، اس کے علاوہ یہاں مقامی خوراک، نامیاتی کاشت اور زرعی سیاحت کو فروغ دینے کے سلسلے میں زبردست کوششوں کا عمل تیزی سے جاری ہے۔
یہ بات قریبی مشاہدے میں سامنے آئی کہ وینکوور اور اس کے گرد و نواح میں بڑی تعداد میں فارمز موجود ہیں۔ درحقیقت برٹش کولمبیا کینیڈا کے ان صوبوں میں سے ایک ہے جہاں زراعت نہایت متنوع، مضبوط اور ترقی یافتہ ہے۔
درج ذیل علاقوں میں زرعی سرگرمیاں بہت فعال ہیں، فریزر ویلی، اوکناگن ویلی اور وینکوور آئی لینڈ۔یہاں کی آب و ہوانرم، زمین زرخیز اور پانی بھی دستیاب ہے جو پھل، سبزیاں اور انگور اگانے کے لیے بہترین ہیں۔
کینیڈا میں برٹش کولمبیا وہ صوبہ ہے جو بلیو بیریز، کرین بیریز اور چیریز کی پیداوار میں سب سے آگے ہے۔ اس کے علاوہ سیب اور آڑو اوکناگن کے علاقے میں بڑی مقدار میں اگائے جاتے ہیں۔
اس صوبے میں زراعت کا شعبہ نہایت مضبوط اور مربوط طریقے سے ترقی کر رہا ہے۔ یہاں سبزیوں کی کاشت، دودھ کی صنعت، انڈے، مرغیاں اور دیگر گوشت کی مصنوعات بھی بڑی مقدار میں پیدا ہوتی ہیں۔ اوکناگن ویلی میں انگور کی کاشت بڑے پیمانے پر ہوتی ہے اور یہاں کی شراب عالمی سطح پر مشہور ہوتی ہے۔
یہاں زراعت کے شعبے میں ایک انقلابی تبدیلی لانے کے لیے ایک تحریک ”فارم ٹو ٹیبل“ یعنی کھیت سے براہ راست کھانے کی میز تک کافی زور پکڑ رہی ہے۔اسی طرح زرعی سیاحت بھی ترقی کر رہی ہے جیسے سیاحوں کے لیے بیریز کا چننا، شہد کی فیکٹریوں کے دورے، دودھ دہی کی تیاری کا عمل دیکھنا وغیرہ۔ زراعت کا شعبہ برٹش کولمبیا صوبے کی معیشت کو مضبوط بنانے میں اہم کردار ادا کرتا ہے کیوں کہ یہ سالانہ اربوں ڈالرز کی آمدنی کا ذریعہ ہے۔اس صوبے میں 17,500 سے زیادہ رجسٹرڈ فارمز ہیں۔
