بھارتی میڈیا کے مطابق جیل میں قید گینگسٹر لارنس بشنوئی کے گروہ سے تعلق رکھنے والے ایک رکن نے بالی ووڈ اداکار سلمان خان کے ساتھ کام کرنے والے فنکاروں، پروڈیوسرز اور ڈائریکٹرز کو قتل کی دھمکیاں دے دی ہیں۔
آن لائن گردش کرنے والی ایک آڈیو ریکارڈنگ میں خود کو “ہیری باکسر” کہلانے والے شخص نے حالیہ فائرنگ کی ذمہ داری قبول کرتے ہوئے کہا کہ جو بھی پروڈیوسر، ڈائریکٹر یا اداکار سلمان خان کے ساتھ کام کرے گا، اسے گولی مار دی جائے گی۔ اس کا کہنا تھا کہ گینگ صرف بڑے ناموں کو ہی نہیں بلکہ چھوٹے درجے کے فلم سازوں اور فنکاروں کو بھی نشانہ بنائے گا، اور سلمان خان کے ساتھ کام کرنے والے اپنی جان کے خود ذمہ دار ہوں گے۔
یہ دھمکی ایسے وقت میں سامنے آئی ہے جب کینیڈا میں کامیڈین کپل شرما کے کیفے کے باہر ایک اور فائرنگ کا واقعہ پیش آیا۔ یاد رہے کہ سلمان خان 21 جون کو نیٹ فلکس پر کپل شرما شو کے تیسرے سیزن کے افتتاحی ایپیسوڈ میں شریک ہوئے تھے۔
لارنس بشنوئی گینگ 1998 کے کالے ہرن کے شکار کیس کے بعد سے سلمان خان کو مسلسل ہدف بنا رہا ہے، کیونکہ بشنوئی برادری کالے ہرن کو مقدس مانتی ہے۔ اپریل 2024 میں سلمان خان کے ممبئی میں گھر کے باہر فائرنگ کے بعد سے ان کی سیکیورٹی مزید سخت کر دی گئی تھی، اس واقعے میں ملوث دو ملزمان کو گرفتار کیا گیا تھا۔
رپورٹس کے مطابق “ہیری باکسر” کا تعلق بھارتی ریاست راجستھان سے ہے، جہاں اس پر دو مقدمات زیرِ سماعت ہیں۔ وہ 2014 میں غیر قانونی طور پر امریکا چلا گیا اور وہاں بشنوئی گینگ سے منسلک ہوگیا۔ بتایا جاتا ہے کہ وہ لارنس بشنوئی کے بھائی انمول بشنوئی سے رابطے میں رہتا ہے اور امریکا میں گینگ کی مبینہ بھتہ خوری کے معاملات دیکھتا ہے۔
