متحدہ عرب امارات کی معروف ایئر لائن کمپنی ایمریٹس نے اپنی پروازوں میں پاور بینکس کے استعمال کے حوالے سے نئے قواعد و ضوابط نافذ کرنے کا اعلان کیا ہے۔ اماراتی میڈیا کے مطابق، ایمریٹس کی جانب سے جاری بیان میں بتایا گیا کہ یکم اکتوبر 2025 سے پروازوں میں کسی بھی قسم کے پاور بینک استعمال کرنا ممنوع ہوگا۔
اگرچہ اب بھی مسافروں کو کچھ شرائط کے تحت ایک پاور بینک ساتھ لے جانے کی اجازت دی جائے گی، تاہم ہوائی جہاز کے کیبن میں پاور بینک استعمال کرنا یا ان سے ڈیوائسز چارج کرنا منع ہوگا۔ اسی طرح، ہوائی جہاز کے پاور سورس سے پاور بینک کو چارج کرنا بھی ممنوع قرار دیا گیا ہے۔
نئے قوانین کے تحت مسافر صرف وہ پاور بینک جہاز پر لے جا سکتے ہیں جس کی صلاحیت 100 واٹ آورز سے کم ہو، اور کسی بھی قسم کی ذاتی ڈیوائس کو جہاز کے اندر پاور بینک سے چارج کرنا منع ہے۔ پاور بینک کی صلاحیت کی معلومات واضح اور نمایاں ہونی چاہیے، اور انہیں اوور ہیڈ اسٹوریج بن میں نہیں رکھا جا سکتا بلکہ صرف سیٹ کی جیب یا سیٹ کے نیچے بیگ میں رکھا جا سکتا ہے۔ مزید برآں، چیک ان شدہ سامان میں پاور بینک کی اجازت نہیں ہوگی۔
یہ اقدام دبئی کی فلیگ شپ کیریئر کی جانب سے جامع حفاظتی جائزے کے بعد کیا گیا ہے تاکہ ہوائی جہاز میں پاور بینکوں سے ممکنہ خطرات کو کم کیا جا سکے۔ نئے ضوابط کے تحت جہاز کے اندر کیبن عملہ فوری طور پر آگ لگنے کی صورت میں موثر کارروائی کر سکے گا، کیونکہ پاور بینک کا ذخیرہ قابل رسائی جگہوں پر ہوگا جس سے حفاظتی امور میں بہتری آئے گی۔
