ہانیہ عامر اور عاصم اظہر کے کنسرٹ کی ویڈیوز وائرل

پاکستان کی مشہور اداکارہ اور ڈمپل کوئین ہانیہ عامر کی گلوکار عاصم اظہر کے کنسرٹ میں جوش و خروش کے ساتھ جھومتی اور گاتی ہوئی ویڈیوز سوشل میڈیا پر وائرل ہو گئیں، جس کے بعد کافی چرچا پیدا ہو گیا۔

پاکستانی شوبز کی معروف شخصیات ہانیہ عامر اور عاصم اظہر ایک بار پھر خبروں کی زینت بن گئے ہیں، جب دونوں کو عاصم کے کنسرٹ میں ایک ساتھ دیکھا گیا۔

یہ جوڑی ماضی میں بہت مقبول تھی اور ان کا تعلق 2018 سے 2019 تک میڈیا کی توجہ کا مرکز رہا، تاہم 2020 میں ہانیہ عامر نے واضح کیا تھا کہ وہ صرف دوست ہیں۔ بعد ازاں عاصم اظہر نے اداکارہ اور ڈیجیٹل انفلوئنسر میرب علی سے منگنی کی، لیکن ان کا رشتہ زیادہ عرصہ نہیں چل سکا اور دونوں نے منگنی ختم کرنے کا اعلان کیا۔

حال ہی میں سوشل میڈیا پر یہ خبریں گردش کرنے لگیں کہ ہانیہ اور عاصم دوبارہ قریب آ رہے ہیں، مگر اس وقت تک کوئی مشترکہ تصویر سامنے نہیں آئی تھی۔ یہ قیاس آرائیاں اس وقت زور پکڑیں جب ہانیہ عامر کو عاصم کے ریوائیو لانچ پارٹی میں ان کی قریبی دوست یشمہ گل کے ساتھ جھومتے دیکھا گیا۔

ہانیہ نے سفید لباس اور چشمہ پہنا ہوا تھا اور وہ عاصم کے گانے ’سانگ ترستی ہیں نگاہیں‘ پر بہت لطف اندوز ہوتی نظر آئیں۔