برطانوی عدالت نے پرواز کے دوران ایئرہوسٹس کو ہراساں کرنے کے جرم میں سابق ماڈل عبیر افتخار کے شوہر سلمان افتخار کو 15 ماہ قید کی سزا سنا دی۔
ڈیلی میل کے مطابق ورجن اٹلانٹک کی لندن سے لاہور جانے والی پرواز میں پاکستانی نژاد برطانوی بزنس مین سلمان افتخار نے نہایت شرمناک رویہ اختیار کیا۔
سلمان افتخار نے دورانِ پرواز شراب کے نشے میں عملے کے ساتھ بدتمیزی کی، ایئرہوسٹس کو ریپ اور قتل کی دھمکیاں دیں اور نسلی تعصب پر مبنی نازیبا زبان استعمال کی۔
یہ واقعہ فروری 2023 میں پیش آیا، تاہم سلمان افتخار کو ایک سال بعد مارچ 2024 میں انگلینڈ میں ان کے گھر سے گرفتار کیا گیا۔
پولیس کی تحقیقات کے بعد سلمان افتخار نے عدالت میں اپنے جرم کا اعتراف کیا، لندن کی عدالت نے انہیں قتل کی دھمکی دینے اور ہراسانی کے الزامات پر 15 ماہ قید کی سزا سنائی۔
متاثرہ ایئرہوسٹس انگی والش، جو کہ 37 سال سے اپنی خدمات سر انجام دے رہی تھیں، اس واقعے کے بعد شدید ذہنی دباؤ کا شکار ہوئیں اور تقریباً 14 ماہ تک چھٹیوں پر رہیں۔
ان کا کہنا تھا کہ یہ ان کے پورے کیریئر کا سب سے خوفناک تجربہ تھا، جس نے ان کی زندگی اور پیشہ ورانہ اعتماد کو بری طرح متاثر کیا۔
خیال رہے کہ سلمان افتخار ایک پرتعیش طرزِ زندگی گزار رہے تھے، ان کی کمپنی نے 2022 میں تقریباً 90 ملین پاؤنڈ کا کاروبار کیا، بعد ازاں وہ مالی مشکلات کا شکار ہو گئی اور ان پر لاکھوں پاؤنڈز کا ٹیکس اور قرض واجب الادا ہو گیا۔
اس کے باوجود وہ مہنگی گاڑیاں، عالیشان گھر اور شاندار تقریبات میں شریک ہوتے رہے۔
عدالت نے فیصلے میں قرار دیا کہ سلمان افتخار کا رویہ نہ صرف ایئرہوسٹس بلکہ تمام مسافروں کے لیے خطرناک اور ناقابل قبول تھا اور ایسی حرکتوں کی کوئی گنجائش نہیں ہے۔
سلمان افتخار برطانیہ میں دو ملین پاؤنڈ کے عالیشان گھر میں اپنی پہلی بیوی اور بچوں کے ساتھ رہتے ہیں۔
پانچ سال قبل انہوں نے پاکستانی ماڈل عبیر افتخار سے دوسری شادی کی تھی، جس کے بعد انہوں نے ماڈلنگ کی دنیا سے کنارہ کشی اختیار کر لی تھی۔
مزید یہ کہ جب انہوں نے دورانِ پرواز ایئرہوسٹس کے ساتھ نامناسب رویہ اختیار کیا، اس وقت ان کے ساتھ ان کی پہلی بیوی اور بچے بھی موجود تھے، جو اس واقعے سے خوف زدہ ہو گئے تھے۔
