کراچی(اسٹاف رپورٹر)جاز نے رواں سال کی پہلی ششماہی میں 25.5 ارب روپے کی سرمایہ کاری کی ہے اور 17.7 فیصد ترقی کے ساتھ مستحکم کارکردگی کا مظاہرہ کیا ہے۔ یہ سرمایہ کاری فور جی نیٹ ورک کی توسیع، ڈیجیٹل پلیٹ فارمز کو فروغ دینے اور مالی شمولیت کے اقدامات پر مرکوز ہے، تاکہ زیادہ سے زیادہ پاکستانی سستی اور معیاری ڈیجیٹل سہولیات سے فائدہ اٹھا سکیں۔جاز نے سال کی دوسری سہ ماہی میں 15.3 فیصد سالانہ ترقی کے ساتھ ایک اور مضبوط کارکردگی دکھائی۔ اس دوران کمپنی کی ڈیجیٹل آمدن میں 35.7 فیصد اضافہ ہوا جو اب مجموعی آمدن کا 28.1 فیصد ہے، جو گزشتہ سال اسی مدت میں 23.9 فیصد تھی۔ کمپنی کا EBITDA 5.4 فیصد بڑھا جبکہ منافع کا تناسب 41.6 فیصد رہا۔ جاز کی ڈیجیٹل مالیاتی سروس جاز کیش کے ماہانہ فعال صارفین کی تعداد 2 کروڑ 10 لاکھ سے زائد ہے، جس نے گزشتہ بارہ ماہ میں 11.7 کھرب روپے کے لین دین کو ممکن بنایا۔ اس نیٹ ورک میں 3 لاکھ 67 ہزار فعال مرچنٹس اور 1 لاکھ 7 ہزار سے زائد فعال ایجنٹس شامل ہیں۔ روزانہ اوسطاً 1 لاکھ 40 ہزار سے زائد ڈیجیٹل قرضے جاری کیے جا رہے ہیں۔جاز کے سی ای او عامر ابراہیم نے کہا کہ،”دوسری سہ ماہی کے نتائج نہ صرف ہماری مالی مضبوطی کو ظاہر کرتے ہیں بلکہ یہ بھی بتاتے ہیں کہ ہم پاکستان کے ڈیجیٹل مستقبل کے لیے کتنے پُرعزم ہیں۔ ہم نے 4G، ڈیجیٹل پلیٹ فارمز اور مالی شمولیت میں تیزی سے سرمایہ کاری کی ہے، اور Deodar جیسے اقدامات کے ذریعے اپنے پورٹ فولیو کو بہتر بنایا ہے، جو مستقبل کی ایک مربوط اور ترقی یافتہ معیشت کی بنیاد رکھ رہے ہیں۔
