پاکستان میڈیکل اینڈ ڈینٹل کونسل (پی ایم اینڈ ڈی سی) نے میڈیکل اینڈ ڈینٹل کالج ایڈمیشن ٹیسٹ (ایم ڈی کیٹ) 2025 کے انعقاد کا اعلان کردیا۔
پی ایم ڈی سی کے مطابق ایم ڈی کیٹ 2025 کا امتحان 5 اکتوبر کو صبح 10 بجے ہوگا، پنجاب کے امیدواروں کا ٹیسٹ یونیورسٹی آف ہیلتھ سائنسز لاہور لے گی۔
سندھ کے امیدواروں کا ایم ڈی کیٹ سکھر آئی بی اے یونیورسٹی لے گی جبکہ خیبر پختونخوا میں خیبر میڈیکل یونیورسٹی امیدواروں کا امتحان لے گی اور بلوچستان کے امیدواروں کا ٹیسٹ یونیورسٹی کوئٹہ لے گی۔
وفاق اور آزاد کشمیر کے امیدواروں کا ٹیسٹ شہید ذوالفقار بھٹو میڈیکل یونیورسٹی اسلام آباد لے گی جبکہ گلگت بلتستان اور ریاض کے امیدواروں کا ٹیسٹ بھی شہید ذوالفقار بھٹو میڈیکل یونیورسٹی اسلام آباد لے گی۔
ایم ڈی کیٹ 2025 کے لیے رجسٹریشن 8 اگست سے شروع ہوگی، رجسٹریشن 25 اگست 2025 تک کرائی جاسکتی ہے، لیٹ فیس کے ساتھ رجسٹریشن کی آخری تاریخ یکم ستمبر ہے۔
پی ایم ڈی سی کے مطابق پاکستان میں ٹیسٹ کے لیے فیس 9 ہزار روپے مقرر کی گئی ہے جبکہ لیٹ فیس کے ساتھ پاکستان میں رجسٹریشن 13 ہزار روپے ہوگی۔
========================
سندھ: ایم ڈی کیٹ کا امتحان آئی بی اے سکھر لے گا
رواں سال بھی سندھ میں ایم ڈی کیٹ کا ٹیسٹ آئی بی اے سکھر لے گا۔
اس بات کی منظوری جمعرات کو سندھ کابینہ کے اجلاس میں دی گئی۔
اجلاس میں کہا گیا کہ گزشتہ ایم ڈی کیٹ ٹیسٹ میں کچھ بےضابطگیوں پر داخلہ پالیسی میں تبدیلی کی گئی، جبکہ محکمہ صحت میڈیکل کالجز میں داخلے کو ریگولیٹ کرے گا۔
یہ پالیسی پبلک اور پرائیویٹ سیکٹر دونوں کے لیے یکساں ہوگی۔ داخلہ پالیسی میں شفافیت اور میرٹ ہماری اولین ترجیح ہے۔
اس موقع پر بتایا گیا کہ پبلک سیکٹر میں ایم بی بی ایس کی 2550 اور بی ڈی ایس کی 500 نشستیں ہیں جبکہ پرائیویٹ سیکٹر میں ایم بی بی ایس کی 1441 اور ڈینٹل کی 2025 نشستیں ہیں۔
=======================
جامعہ کراچی اور شعبہ کیمیا کے 1973 ء بیچ کے سابق طلباء کے مابین مفاہمتی یادداشت پر دستخط
جامعہ کراچی اور شعبہ کیمیاء کے سابق طلباء، بیچ 1973 کے مابین ایک مفاہمتی یادداشت (MoU) پر دستخط کی تقریب گزشتہ روز وائس چانسلر سیکریٹریٹ جامعہ کراچی میں منعقد ہوئی، جس کا مقصد شعبہ کی انفرااسٹرکچر کو بہتر بنانا اور طلباء کے لیے اسکالرشپ کے مواقع کو بڑھانا ہے۔مفاہمتی یادداشت پر جامعہ کراچی کے وائس چانسلر پروفیسرڈاکٹر خالد محمودعراقی اور شعبہ کیمیاء کے 1973 بیچ کے ممبران زاہد علی بیگ، سید عابد ممتاز اور ضیاء الرحمان نے دستخط کئے۔
اس موقع پر شعبہ کیمیاء جامعہ کراچی کے اساتذہ، صدرشعبہ ہیلتھ فزیکل ایجوکیشن اینڈ اسپورٹس سائنسز جامعہ کراچی پروفیسر ڈاکٹر باسط انصاری اور سابق طلباء کے گروپ کے دیگرممبران جن میں پروفیسر کامل شیخ، پروفیسر زرار حسین اور دیگر شامل ہیں، بھی موجود تھے۔
بیچ 1973 کے سابق طلباء نے 2023 میں شعبہ کیمیاء کے ساتھ اپنا تعاون شروع کیا تھا اور اب انہوں نے طلباء اور فیکلٹی کے لیے بہتر سہولیات فراہم کرنے اور پہلے سے جاری اسکالرشپس کی تعداد بڑھانے کا منصوبہ بنایا ہے تاکہ زیادہ سے زیادہ طلباء اس سے مستفید ہو سکیں۔اپنی گولڈن جوبلی (پچاسویں سالگرہ) کے موقع پر اس گروپ نے شعبہ کی لیبارٹریز کو تجزیاتی آلات، کتابیں، کمپیوٹرز اور دیگر برقی آلات عطیہ کئے تھے اور اب انہوں نے ایم فل اور پی ایچ ڈی کے طلباء کو اسکالرشپس فراہم کرنے، عمارت کی واٹر پروفنگ، نئے پانی کے ٹینک کی تعمیر، زیرِ زمین پانی کے اسٹوریج ٹینک کی تعمیر، پرانی سیوریج لائنز کی تبدیلی، لیبارٹریز میں موجود مسائل کا حل، لائبریری کی گنجائش میں اضافہ، اور جدید آلات و مشینری کی فراہمی کا منصوبہ بنایا ہے تاکہ طلباء اور اساتذہ کو جدید سہولیات میسر آ سکیں۔
اس موقع پر جامعہ کراچی کے وائس چانسلر پروفیسر ڈاکٹر خالد محمود عراقی نے سابق طلباء کے اس جذبے کو سراہتے ہوئے کہا کہ یہ واقعی باعثِ فخر ہے کہ ہمارے سابق طلباء آج بھی اپنے شعبہ سے اسی محبت اور وابستگی کے ساتھ جڑے ہوئے ہیں۔ ان کی جانب سے جدید ٹیکنالوجی اور وسائل کی فراہمی سے فیکلٹی اور طلباء کو بے حد فائدہ ہوگا۔
=======================
جامعہ کراچی اور اورنج ٹری فاؤنڈیشن کے مابین مفاہمتی یادداشت پر دستخط
شعبہ ابلاغ عامہ کے طلباء کے لیے اسکالرشپس کا اعلان
جامعہ کراچی کے شعبہ ابلاغ عامہ (ماس کمیونیکیشن) اور اورنج ٹری فاؤنڈیشن (OTF) کے مابین گزشتہ روز ایک مفاہمتی یادداشت (MoU) پر دستخط کی تقریب وائس چانسلر سیکریٹریٹ جامعہ کراچی میں منعقد ہوئی۔مفاہمتی یادداشت پر جامعہ کراچی کے وائس چانسلر پروفیسرڈاکٹرخالد محمودعراقی اوراورنج ٹری فاؤنڈیشن کے سی ای او عمر متین اللہ والا نے دستخط کئے۔مفاہمتی یادداشت کا مقصد بی ایس ماس کمیونیکیشن اور بی ایس ڈیجیٹل میڈیا مارکیٹنگ پروگرامز کے مستحق اور باصلاحیت طلباء کو میرٹ اور مالی ضرورت کی بنیاد پر وظائف (اسکالرشپس) فراہم کرنا ہے۔ یہ وظائف صبح و شام دونوں شفٹوں کے طلباء کے لیے دستیاب ہوں گے۔
مفاہمتی یادداشت کے تحت صرف ٹیوشن فیس ہی نہیں بلکہ طلباء کی دیگر تعلیمی ضروریات اور شعبے میں استعمال ہونے والے آلات کی فراہمی کے لیے بھی تعاون فراہم کیا جائے گا۔اس موقع پر جامعہ کراچی کے وائس چانسلر پروفیسر ڈاکٹر خالد محمود عراقی،رئیس کلیہ فنون وسماجی علوم جامعہ کراچی پروفیسرڈاکٹرثمینہ سعید، انچارج اسٹوڈنٹ فنانشل ایڈ آفس پروفیسر ڈاکٹر ذی اسما حنیف خان، میڈیکل کنسلٹنٹ ڈاکٹر اکمل وحید، رکن سنڈیکیٹ ڈاکٹر محمد حسان اوج، شعبہ ابلاغ عامہ کے فیکلٹی ممبران، ڈائریکٹر آفس آف ریسرچ انوویشن اینڈ کمرشلائزیشن (ORIC) ڈاکٹر سیدہ حور العین، اور ORIC کا عملہ موجود تھا۔ اورنج ٹری فاؤنڈیشن کے شریک بانی اور سی ای او جناب عمر متین اللہ والا بھی اپنی ٹیم کے ہمراہ موجود تھے۔
اس موقع پر عمر متین نے کہا کہ ان کی تنظیم مستقبل کے میڈیا پروفیشنلز کی تعلیم میں معاونت کے لیے پُرعزم ہے۔ انہوں نے بتایا کہ اس اشتراک کے تحت فاؤنڈیشن صبح اور شام دونوں شفٹوں میں جاری پروگرامز کے متعدد طلباء کو وظائف فراہم کرے گی۔
انہوں نے مزید کہا کہ اورنج ٹری فاؤنڈیشن جامعہ کراچی کے طلباء کو بااختیار بنانے کے لیے پرعزم ہے اور یہی وجہ ہے کہ وہ صحافیوں، میڈیا پروفیشنلز اور ڈیجیٹل کہانی کاروں کی اگلی نسل میں سرمایہ کاری کر رہے ہیں۔
جامعہ کراچی کے وائس چانسلر پروفیسر ڈاکٹر خالد عراقی نے اپنے خیالات کا اظہار کرتے ہوئے کہا کہ پبلک پرائیویٹ شراکت داریاں ترقی اور بااختیاری کے نئے راستے کھولتی ہیں۔ ایسی شراکتیں طلباء کے لیے نئے مواقع پیدا کرتی ہیں اور جامعہ کے ترقی پسند کردار کو مزید مضبوط کرتی ہیں۔انہوں نے کہا کہ جامعہ کراچی کا نہ صرف شعبہ ابلاغ عامہ بلکہ تمام شعبہ جات اور تحقیقاتی ادارے پبلک وپرائیویٹ اداروں کے ساتھ اشتراک کے لئے تیار ہیں تاکہ تحقیق اور جدت کے کلچر کو فروغ دیا جا سکے۔
