امریکی کمپنی “اسٹار لنک” کی آمد کے بعد، اب متعدد چینی ٹیکنالوجی کمپنیاں بھی پاکستان میں سیٹلائٹ انٹرنیٹ فراہم کرنے کے لیے متحرک ہو گئی ہیں۔ ان اداروں نے پاکستان میں اپنی خدمات شروع کرنے میں گہری دلچسپی ظاہر کی ہے، جس سے ملک میں انٹرنیٹ کے نئے دور کا آغاز متوقع ہے۔
ذرائع کے مطابق، حکومت نے متعلقہ اداروں کو ہدایت دی ہے کہ وہ سیٹلائٹ انٹرنیٹ سروسز سے متعلق قواعد و ضوابط اور لائسنسنگ کا عمل جلد از جلد مکمل کریں تاکہ عالمی کمپنیوں کو پاکستان میں کام کرنے کی راہ ہموار ہو سکے۔
اسپیس ایکٹیویٹی ریگولیٹری بورڈ نے اس حوالے سے تیار کردہ کنسلٹنٹ رپورٹ متعلقہ حکام کو ارسال کر دی ہے، تاکہ اسے مدنظر رکھ کر لائحہ عمل طے کیا جا سکے۔ پاکستان ٹیلی کمیونیکیشن اتھارٹی (PTA) اس رپورٹ کی بنیاد پر قواعد و ضوابط ترتیب دے گی۔
اس عمل کے دوران اس پہلو پر بھی غور کیا جا رہا ہے کہ آیا موبائل فونز کو براہِ راست سیٹلائٹ سے جوڑا جا سکتا ہے یا نہیں، تاکہ دور دراز علاقوں میں بھی رابطے ممکن بنائے جا سکیں۔ جیسے ہی تمام قانونی اور تکنیکی تقاضے مکمل ہوں گے، کمپنیوں کی رجسٹریشن کا عمل شروع کر دیا جائے گا۔
