خراب موسم کے باعث متعدد پروازیں متاثر

ملک کے مختلف حصوں میں خراب موسم اور فضائی آپریشن میں خلل کے باعث کئی پروازوں کے نظام میں شدید گڑبڑ پیدا ہو گئی۔ کراچی سے اسلام آباد جانے والی ایک پرواز کو فیصل آباد میں ہنگامی طور پر اتارنا پڑا۔

اسلام آباد ایئرپورٹ پر بھی موسم کی خرابی نے اثر دکھایا، جہاں 21 پروازوں کی آمد و روانگی میں تاخیر کا سامنا کرنا پڑا۔ ریاض، ابوظبی، مسقط، باکو اور دوحہ سے آنے والی پروازوں کو لینڈنگ میں مشکلات پیش آئیں۔

ایئرپورٹ ذرائع کے مطابق غیر ملکی پروازوں کی روانگی میں 1 سے 2 گھنٹے کی تاخیر ریکارڈ کی گئی۔

دوسری جانب، کراچی سے لاہور جانے والی ایک پرواز کو ساڑھے 4 گھنٹے تاخیر کا سامنا رہا، جو دوپہر ساڑھے 12 بجے روانہ ہوئی۔ اسی طرح، کراچی سے اسلام آباد جانے والی نجی ایئر لائن کی پرواز بھی 2 گھنٹے تاخیر سے روانہ ہوئی۔

ادھر کوالالمپور سے لاہور آنے والی دو بین الاقوامی پروازیں مکمل طور پر منسوخ کر دی گئیں، جبکہ لاہور ایئرپورٹ پر 7 پروازوں کی آمد اور روانگی میں 1 سے ساڑھے 9 گھنٹے کی تاخیر ریکارڈ کی گئی۔

ایوی ایشن حکام کے مطابق، مسافروں کو بروقت آگاہ کرنے اور متبادل انتظامات کے لیے اقدامات کیے جا رہے ہیں۔