امریکی دارالحکومت واشنگٹن ایک منظم اور خوبصورت شہر

امریکی دارالحکومت واشنگٹن ایک منظم اور خوبصورت شہر
رب کا جہاں
نوید نقوی

قارئین رب کا جہاں ایک ایسا سلسلہ ہے جس کو پڑھ کر آپ کا دل امید کی روشنی اور علم کی طاقت سے منور ہو جائے گا۔ کسی بزرگ نے کیا ہی خوب کہا ہے کہ دنیا گھومیں آپ کا خدا پر ایمان مضبوط ہوگا، اگر آپ دنیا گھوم نہیں سکتے تو میری طرح پڑھ کر اپنے دل کو منور کر سکتے ہیں۔ افریقہ سے ڈائریکٹ ہم ریاست ہائے متحدہ امریکہ چلتے ہیں اور دنیا کے سب سے طاقتور دارالحکومت کی سیر کرتے ہیں۔ یاد رہے کہ دنیا کے خوبصورت اور منظم ترین شہروں میں شمار ہونے والا شہر واشنگٹن ڈی سی Washington D.C ریاست ہائے متحدہ امریکہ United States of America کا دارالحکومت ہے۔ یہ شہر نہ صرف اپنی سیاسی اہمیت کی وجہ سے مشہور ہے بلکہ اپنی دلکش عمارتوں، وسیع و عریض پارکوں، تاریخی یادگاروں اور جدید طرزِ زندگی کی بدولت دنیا بھر کے سیاحوں کو اپنی طرف کھینچتا ہے۔ اس شہر کی ایک خاص سیاسی و تاریخی اہمیت ہے جس کا انکار دنیا کا کوئی بھی شخص نہیں کر سکتا۔
واشنگٹن ڈی سی کا شمار دنیا کے سب سے اہم سیاسی مراکز میں ہوتا ہے۔ یہاں امریکہ کی کانگریس Congress، صدر کی سرکاری رہائش گاہ جسے وائٹ ہاؤس White House کہا جاتا ہے۔ اس کے علاؤہ سپریم کورٹ، 177 سے زائد غیر ملکی سفارت خانے اور عالمی بینک، بین الاقوامی مالیاتی فنڈ، تنظیم برائے امریکی ممالک اور دیگر بین الاقوامی تنظیموں کے صدر دفتر ہیں۔ اس کے علاؤہ مختلف پارکس اور کاروباری مراکز بھی قائم ہیں۔ ان عمارتوں کو دیکھنے کے لیے ہر سال لاکھوں لوگ دنیا بھر سے آتے ہیں۔ یہ شہر امریکہ کا دارالحکومت ہونے کی وجہ سے اپنی خوبصورتی اور سیاحت کے حوالے سے شہرت رکھتا ہے۔
واشنگٹن میں موسم بہار کا نظارہ انتہائی دلکش ہوتا ہے، خاص طور پر جب چیری بلاسم Cherry Blossom کے پھول کھلتے ہیں۔ امریکی دارالحکومت میں کئی خوبصورت پارک اور باغات بھی ہیں۔ ان میں سے چند کا ذکر یہاں کرنا ضروری ہے۔
نیشنل مال،
لنکن میموریل Lincoln Memorial،
جیفرسن میموریل Jefferson Memorial،
اسمتھ سونین عجائب گھر Smithsonian Museums،
یہ تمام جگہیں فری انٹری کے ساتھ سیاحوں کو تاریخ، سائنس، فن اور فطرت کی سیر کراتی ہیں۔ اس شہر کی آبادی صرف آٹھ لاکھ کے قریب نفوس پر مشتمل ہے۔ یہ شہر دریائے پوٹومیک کے مشرقی کنارے پر واقع ہے، جو ورجینیا کے ساتھ اپنی جنوب مغربی سرحد بناتا ہے اور اس کے شمال اور مشرق میں میری لینڈ کی سرحدیں ملتی ہیں۔ اس شہر کا نام جارج واشنگٹن، امریکی انقلاب میں کانٹی نینٹل آرمی کے کمانڈنگ جنرل اور ریاستہائے متحدہ کے پہلے صدر کے لیے رکھا گیا تھا۔
یہ شہر علمی اور تہذیبی اعتبار سے بھی بہت اہم ہے۔ یہاں کی جامعات، مثلاً جارج واشنگٹن یونیورسٹی George Washington University اور جارج ٹاؤن یونیورسٹی دنیا بھر میں مشہور ہیں۔ واشنگٹن میں مختلف ثقافتوں کے لوگ آباد ہیں، جس سے یہاں ایک متنوع اور خوشحال معاشرہ وجود میں آیا ہے۔ اگر آپ کو زندگی میں موقع ملے تو عظیم امریکہ کے دارالحکومت لازمی جائیں کیونکہ
واشنگٹن ڈی سی صرف ایک سیاسی مرکز نہیں بلکہ ایک خوبصورت، صاف ستھرا اور پرامن شہر بھی ہے جہاں تاریخ، تعلیم، فن، اور قدرتی مناظر ایک ساتھ موجود ہیں۔ اگر آپ کو خوبصورتی، معلومات اور ثقافت سے دلچسپی ہے تو واشنگٹن کا سفر آپ کے لیے ایک یادگار تجربہ ثابت ہو سکتا ہے۔