بھارت کی ریاست اتراکھنڈ کے ضلع اترا کاشی میں شدید بارشوں کے نتیجے میں آنے والے کلاؤڈ برسٹ اور زمین کھسکنے کے واقعات نے بڑے پیمانے پر تباہی مچادی، جس میں کم از کم 4 افراد جان کی بازی ہار گئے جبکہ کئی دیگر لاپتہ ہو گئے۔
بھارتی میڈیا رپورٹس کے مطابق، اترا کاشی کے قریبی علاقے دھرالی گاؤں میں پہاڑ سے اترنے والے تیز ریلے نے متعدد مکانات، دکانیں اور ہوٹلوں کو اپنی لپیٹ میں لے لیا، جس کے باعث 50 سے زائد افراد کے لاپتہ ہونے کی اطلاعات ہیں۔
حکام نے تصدیق کی ہے کہ اب تک 4 افراد کی لاشیں نکالی جا چکی ہیں جب کہ امدادی کارروائیاں جاری ہیں۔
ادھر محکمہ موسمیات نے خبردار کیا ہے کہ ریاست اتراکھنڈ میں 10 اگست تک موسلا دھار بارش کا سلسلہ جاری رہنے کا امکان ہے، جس سے مزید خطرات جنم لے سکتے ہیں۔
