پاکستانی اداکار، ہدایتکار اور پروڈیوسر نبیل ظفر نے ملک میں بڑھتی مہنگائی اور ہوشربا بجلی بلوں پر سخت تحفظات کا اظہار کیا ہے۔
ایک نجی چینل کے پروگرام میں گفتگو کرتے ہوئے نبیل ظفر نے کہا کہ آج کل کے بجلی کے بل اتنے زیادہ ہو چکے ہیں کہ انسان کا دل بند ہونے کو آ جائے۔ انہوں نے بتایا کہ اب وہ گھر میں کسی پنکھے یا اضافی بلب کو جلتا دیکھ کر فوراً بند کرنے کا کہتے ہیں، کیونکہ بلوں کی زیادتی سے وہ شدید پریشان ہو چکے ہیں۔
نبیل نے ہنستے ہوئے کہا کہ اب انہیں ایسا لگتا ہے جیسے اُن کے مرحوم والد کی روح اُن میں آ چکی ہو، کیونکہ اب وہ بھی بار بار یہی دہراتے ہیں: “بل بہت آئے گا بھائی”۔
اداکار نے یہ بھی بتایا کہ انہوں نے اس مسئلے سے نمٹنے کے لیے اپنے گھر پر سولر سسٹم لگوا لیا ہے، مگر جب کراچی کا موسم ابر آلود ہو، تو یہ سسٹم بھی ناکام ہو جاتا ہے۔
انہوں نے حالیہ دنوں کراچی میں مسلسل بادلوں کی موجودگی کا ذکر کرتے ہوئے مزاحیہ انداز میں کہا کہ دل کرتا ہے بادلوں سے مخاطب ہو کر کہوں، “یا تو خوب برسو یا پھر چلتے بنو، تاکہ سولر پینلز سکون سے کام کریں۔”
