کراچی کے پوش علاقے ڈیفنس فیز 2 میں ایک تیز رفتار ٹریلر بے قابو ہو کر رہائشی بنگلے میں گھس گیا، حادثے کے نتیجے میں دو افراد معمولی زخمی ہو گئے۔
تفصیلات کے مطابق، ڈیفنس لائبریری کے قریب پیش آنے والے اس واقعے میں ٹریلر نے بنگلے کی دیوار توڑتے ہوئے مرکزی حصے کو نقصان پہنچایا۔
زخمی افراد کی شناخت 32 سالہ رمضان اور 29 سالہ ارشد کے طور پر کی گئی، جنہیں فوری طور پر ایدھی ایمبولینس کے ذریعے جناح اسپتال منتقل کیا گیا۔
ریسکیو 1122 کے ترجمان کا کہنا ہے کہ حادثے میں بنگلے کی دیوار کو شدید نقصان پہنچا جبکہ ٹرالر کا اگلا حصہ مکمل طور پر تباہ ہو گیا۔
حادثے کے بعد ٹریفک پولیس نے کرین کی مدد سے ٹریلر کو موقع سے ہٹا کر تھانے منتقل کر دیا، اور واقعے سے متعلق مزید تحقیقات کا آغاز کر دیا گیا ہے۔
