ملک کے مختلف حصوں میں بارشوں کا سلسلہ جاری

اسلام آباد کے مختلف علاقوں میں وقفے وقفے سے بارش کا سلسلہ جاری ہے، جب کہ کراچی کے متعدد مقامات پر رات کے وقت کہیں ہلکی بارش اور کہیں بوندا باندی دیکھی گئی۔

محکمہ موسمیات نے پیشگوئی کی ہے کہ آج سے 7 اگست تک اسلام آباد، پنجاب، خیبر پختونخوا، کشمیر اور گلگت بلتستان کے بعض علاقوں میں وقفے وقفے سے تیز اور موسلادھار بارشیں ہونے کا امکان ہے۔

اس کے علاوہ، 6 اگست کو بلوچستان میں بھی کئی علاقوں میں شدید بارشیں متوقع ہیں، جب کہ سندھ کے ساحلی علاقے آئندہ دنوں میں جزوی ابر آلود رہنے کے ساتھ ساتھ ہلکی بارش یا بوندا باندی کا سامنا کر سکتے ہیں۔

ادھر دریائے سندھ میں کالا باغ، تونسہ، گڈو اور سکھر بیراج کے مقامات پر نچلے درجے کا سیلاب بدستور موجود ہے، اور متعلقہ حکام صورتحال پر نظر رکھے ہوئے ہیں۔