پاکستان انٹرنیشنل ایئرلائن (پی آئی اے) کی نجکاری کے عمل میں واضح پیش رفت دیکھنے میں آئی ہے۔ پیر سے متعدد سرمایہ کار کمپنیوں کے نمائندے کراچی میں واقع پی آئی اے ہیڈ آفس اور دیگر تنصیبات کا جائزہ لیں گے۔
ذرائع کے مطابق، پی آئی اے حکام کو کمپنیوں کے دوروں کا باقاعدہ شیڈول موصول ہو چکا ہے۔
دورے کے دوران اصفہانی ہینگر سمیت مختلف مقامات پر طیاروں کا معائنہ کروایا جائے گا۔ اس عمل میں ایئر بیو، عارف حبیب کنسورشیم، فوجی فرٹیلائزرز، اور لکی گروپ کنسورشیم کے نمائندے شامل ہوں گے۔
سرمایہ کاروں کو ایئر سروس ایگریمنٹس، پروازوں کے روٹس، آمدنی کے ذرائع، اور ملازمین کی تفصیلات کے حوالے سے بھی تفصیلی بریفنگ دی جائے گی۔
یاد رہے کہ کچھ ہفتے قبل نجکاری کمیشن بورڈ نے پی آئی اے کی نجکاری کے عمل کے لیے چار ممکنہ سرمایہ کاروں کو پری کوالیفائی کیا تھا، جب کہ کابینہ کمیٹی برائے نجکاری نے روزویلٹ ہوٹل کے لین دین کے ڈھانچے کی منظوری بھی دی تھی۔
نجکاری کے حوالے سے وزارت کی جانب سے جاری کردہ اعلامیے میں بتایا گیا تھا کہ حکومتی پالیسی کے تحت نجکاری کے قومی ایجنڈے میں تیزی سے پیش رفت ہو رہی ہے۔
اس ضمن میں نجکاری کمیشن بورڈ اور کابینہ کمیٹی نے حالیہ اجلاسوں میں دو اہم فیصلے کیے، جو کہ اسٹریٹجک سطح پر نجکاری کے عمل کو مزید آگے لے جانے میں مددگار ثابت ہوں گے۔
واضح رہے کہ نجکاری کمیشن کے 237 ویں اجلاس کی صدارت مشیرِ وزیراعظم برائے نجکاری اور چیئرمین نجکاری کمیشن محمد علی نے کی، جہاں پی آئی اے کی نجکاری سے متعلق اہم پیش رفت سامنے آئی اور دلچسپی رکھنے والی کمپنیوں کی ابتدائی منظوری دی گئی۔
