پاکستان اور کرغزستان نے کرپٹو کرنسی، بلاک چین ٹیکنالوجی اور ڈیجیٹل مالیات کے شعبوں میں تعاون کو فروغ دینے کے لیے مشترکہ اقدامات پر آمادگی ظاہر کی ہے۔ اس سلسلے میں وزیر مملکت برائے کرپٹو و بلاک چین، بلال بن ثاقب اور کرغزستان کی نیشنل انویسٹمنٹ ایجنسی کے ڈائریکٹر، فرخت امینوو کے درمیان اعلیٰ سطحی ویڈیو کانفرنس کا انعقاد کیا گیا۔
اجلاس کے دوران کرپٹو اور بلاک چین سے وابستہ مختلف امور، ٹیکنالوجی کے تبادلے، اور مجوزہ ضابطہ جاتی فریم ورک پر تفصیلی گفتگو ہوئی۔ کرغزستان کے نمائندے نے معلومات اور تجربات کے تبادلے کو وقت کی ضرورت قرار دیا اور عالمی بہترین طریقوں کو اپنانے کی اہمیت پر زور دیا۔
بلال بن ثاقب نے کرغزستان کو ڈیجیٹل اثاثوں کے شعبے میں ایک اہم شراکت دار قرار دیتے ہوئے کہا کہ دونوں ممالک کے تعلقات مستقبل کی ڈیجیٹل معیشت کی بنیاد کو مضبوط بنا سکتے ہیں۔
دونوں فریقین نے کرپٹو کرنسی سے متعلق ایک مفاہمتی یادداشت (MOU) پر دستخط کی تجویز پر بھی گفتگو کی اور خطے میں محفوظ، شفاف اور ترقی یافتہ ڈیجیٹل نظام کے قیام کے لیے مشترکہ کاوشیں جاری رکھنے پر اتفاق کیا۔
اجلاس میں اس بات پر بھی زور دیا گیا کہ وسطی اور جنوبی ایشیائی ممالک کو ڈیجیٹل فنانس اور بلاک چین ٹیکنالوجی کو فروغ دینے کے لیے ریجنل سطح پر تعاون کو بڑھانا ہوگا۔
