عالمی سطح پر بدلتے موسمی حالات کے اثرات پاکستان میں بھی نمایاں ہونے لگے ہیں۔ ماہرین موسمیات نے پیش گوئی کی ہے کہ رواں سال ملک میں مون سون سیزن معمول سے زیادہ طویل رہ سکتا ہے، خصوصاً جنوبی حصوں میں ستمبر کے اختتام تک بارشوں کا سلسلہ جاری رہنے کا امکان ہے۔
عام طور پر جنوبی پاکستان میں مون سون کا اختتام 15 ستمبر تک ہو جاتا ہے، تاہم موسم میں غیر معمولی تبدیلیوں کے باعث اس سال مون سون بارشوں کا پیٹرن تبدیل ہو رہا ہے۔ ماہرین کے مطابق شمالی اور بالائی علاقوں میں مون سون ہواؤں کا اثر زیادہ دیکھنے میں آ رہا ہے، جبکہ جنوبی علاقوں میں اس کا دائرہ محدود رہا ہے، جو ممکنہ طور پر دیر سے فعال ہوگا۔
تازہ ترین موسمی جائزوں کے مطابق 10 اگست کے بعد مون سون ہوائیں جنوب کا رخ کر سکتی ہیں، جس کے نتیجے میں کراچی، حیدرآباد، ٹھٹھہ، بدین اور زیریں سندھ کے دیگر اضلاع میں بارشوں کے امکانات بڑھ جائیں گے۔ اگست کے وسط میں مون سون سسٹم کے متحرک ہونے سے معمول سے زیادہ بارشیں متوقع ہیں۔
موسمیاتی ماہرین کا کہنا ہے کہ موسمی تبدیلیوں نے نہ صرف بارشوں کے پیٹرن کو متاثر کیا ہے بلکہ خطے کے درجہ حرارت، ہوا کے دباؤ اور نمی میں بھی اتار چڑھاؤ پیدا کر دیا ہے۔ یہی عوامل مون سون سیزن کے دورانیے اور شدت پر براہ راست اثر ڈال رہے ہیں۔
ماہرین نے خبردار کیا ہے کہ ان موسمی تبدیلیوں کے پیش نظر شہریوں اور حکومتی اداروں کو محتاط منصوبہ بندی کرنی چاہیے تاکہ ممکنہ جانی و مالی نقصانات سے بچا جا سکے۔
