بالی ووڈ پر تین دہائیوں سے زیادہ عرصے تک راج کرنے والے اور “کنگ خان” کے نام سے مشہور اداکار شاہ رخ خان کو بالآخر ان کی فنی خدمات کا سب سے بڑا بھارتی اعزاز، نیشنل فلم ایوارڈ، مل گیا۔
شاہ رخ خان نے 1992 میں فلم دیوانہ کے ذریعے اپنے فلمی سفر کا آغاز کیا، جس کے بعد وہ مسلسل ہٹ فلموں کا حصہ بنتے گئے۔ دل والے دلہنیا لے جائیں گے، چک دے انڈیا، کچھ کچھ ہوتا ہے جیسی کامیاب فلموں میں ان کی شاندار اداکاری نے انہیں بالی ووڈ کے سپر اسٹارز کی صف میں شامل کر دیا۔ اگرچہ انہیں دنیا بھر میں کئی ایوارڈز اور اعزازات مل چکے تھے، لیکن بھارت کا سب سے بڑا فلمی اعزاز اب تک ان سے دور رہا۔
تاہم اب انتظار ختم ہو چکا ہے۔ بھارتی میڈیا کے مطابق، شاہ رخ خان کو 2023 میں ریلیز ہونے والی فلم جوان میں بہترین اداکارانہ کارکردگی پر نیشنل فلم ایوارڈ سے نوازا گیا ہے۔ یہ اعزاز یکم اگست کو 71ویں نیشنل فلم ایوارڈز کے موقع پر دیا گیا۔
دلچسپ بات یہ ہے کہ یہ ایوارڈ انہیں اداکار وکرانت میسی کے ساتھ مشترکہ طور پر دیا گیا، جنہوں نے فلم بارہویں فیل میں یادگار اداکاری کی۔
اسی تقریب میں اداکارہ رانی مکھرجی کو بھی فلم مسز چیٹرجی میں عمدہ کردار پر نیشنل ایوارڈ سے نوازا گیا۔
اس کامیابی پر شاہ رخ خان نے انسٹاگرام پر ایک ویڈیو پیغام جاری کرتے ہوئے حکومتِ ہند اور اپنے مداحوں کا شکریہ ادا کیا۔ ویڈیو میں وہ نہایت خوش اور پُرمسرت نظر آ رہے تھے۔
https://www.instagram.com/reel/DM0gt2tIYRH/?utm_source=ig_embed&utm_campaign=loading
