پاکستان کے خلائی ادارے سپارکو (Space & Upper Atmosphere Research Commission) کے مطابق، نیا ریموٹ سینسنگ سیٹلائٹ ملکی خلائی پروگرام میں ایک اہم قدم ہے جو زمین کے معائنے کی صلاحیت کو مزید بہتر بنائے گا۔
پاکستان ریموٹ سینسنگ سیٹلائٹ-1 (PRSS-1) کو جمعرات کی صبح 10 بجے چین کے ژیچانگ سیٹلائٹ لانچ سینٹر سے کائیژو-1 اے راکٹ کے ذریعے خلا میں بھیجا گیا۔
سرکاری خبر رساں ایجنسی اے پی پی کے مطابق سپارکو نے اپنے اعلامیے میں کہا کہ یہ سیٹلائٹ شہری ترقی، قدرتی آفات سے نمٹنے، غذائی تحفظ اور ماحولیات کے تحفظ جیسے اہم شعبوں میں مثبت تبدیلی لانے کی صلاحیت رکھتا ہے۔
یہ سیٹلائٹ ماحولیاتی تغیرات کی نگرانی، آبی ذخائر کے انتظام، زرعی سروے، اور جنگلات کی کٹائی پر نظر رکھنے میں مددگار ہوگا۔
یہ منصوبہ سپارکو، چائنا الیکٹرانکس ٹیکنالوجی گروپ کارپوریشن اور مائیکروسیٹ چائنا کے اشتراک سے مکمل ہوا، جو دوستی اور ٹیکنالوجی میں اشتراک کی ایک بڑی مثال ہے۔
سیٹلائٹ کے ذریعے درست زرعی منصوبہ بندی، انفراسٹرکچر کی نگرانی، شہری آبادی کے پھیلاؤ پر قابو پانے، اور علاقائی ترقی کی مؤثر منصوبہ بندی ممکن ہوگی۔
اس کے علاوہ یہ سیٹلائٹ زلزلوں سے قبل خبردار کرنے اور گلیشیئرز کے پگھلنے کے عمل کو بھی مانیٹر کرے گا، جو ماحولیاتی تحفظ اور قدرتی آفات سے بچاؤ کے لیے نہایت اہم ہے۔
