کراچی میں ایک افسوسناک واقعے میں ایک شخص نے دو کمسن بچوں کو سمندر میں دھکا دینے کے بعد خود بھی چھلانگ لگا دی، جسے مبینہ طور پر خودکشی کی کوشش قرار دیا جا رہا ہے۔
واقعے کی اطلاع ملنے پر ایدھی اور چھیپا فاؤنڈیشن کے غوطہ خور فوری طور پر جائے وقوعہ پر پہنچے اور تینوں کی تلاش کا کام شروع کر دیا۔
عینی شاہدین کے مطابق مذکورہ شخص نشے کا عادی لگ رہا تھا، اور جب اس نے بچوں سمیت سمندر میں چھلانگ لگائی تو قریبی افراد نے انہیں بچانے کی کوشش کی، مگر وہ کامیاب نہ ہو سکے۔
ایک اور گواہ نے بتایا کہ جب وہ جائے وقوعہ پر پہنچا تو پانی میں لاشیں تیرتی نظر آئیں، جس پر اس نے فوری طور پر پولیس اور ریسکیو اداروں کو اطلاع دی۔
پولیس کے مطابق واقعے کی تحقیقات جاری ہیں تاکہ ڈوبنے والے افراد کی شناخت کی جا سکے۔ عینی شاہدین کے بیان کے مطابق دونوں بچوں کی عمریں تقریباً پانچ سے چھ سال کے درمیان تھیں۔
ایدھی فاؤنڈیشن کے مطابق رات کے اندھیرے کے باعث تلاش کا کام روک دیا گیا ہے، جو جمعہ کی صبح دوبارہ شروع کیا جائے گا۔
