سرسید یونیورسٹی میں آئی کوڈ گرو iCodeGuruکے حوالے سے ایک خصوصی سیشن کا انعقاد۔
کراچی، 31/جولائی 2025۔۔ سرسید یونیورسٹی آف انجینئرنگ اینڈ ٹیکنالوجی کے شعبہ مرکز رہنمائی و مشاورت کے زیرِ اہتمام ایک شاندار اور بصیرت افروز سیشن کا انعقاد کیا گیا، جس میں عالمی شہرت یافتہ ٹیک ماہر، آئی کوڈ گرو سلیکون ویلی امریکہ کے بانی و صدر ڈاکٹر ظفر شاہد نے طلبہ و طالبات سے خطاب کیا۔ اس سیشن کا مقصد نوجوانوں کو جدید ٹیکنالوجی، عالمی ملازمتوں اور کاروباری مواقع کے بارے میں آگاہی فراہم کرنا تھا۔
اپنے خطاب میں ڈاکٹر ظفر شاہد نے نہایت پُرجوش انداز میں اپنی ذاتی جدوجہد، تجربات اور کامیابیوں کا احوال بیان کیا۔ انہوں نے بتایا کہ جس مقام تک پہنچنے میں انہیں 18 سال لگے، ہماری نوجوان نسل اسی منزل کو صرف 18 مہینے میں حاصل کر سکتی ہے بشرطیکہ ان کی رہنمائی، تربیت اور سمت درست ہو۔
انکا کہنا تھا کہ آئی کوڈ iCodeGuruکا مشن بغیر کسی معاوضہ کے ذہین اور باصلاحیت نوجوانوں کو عالمی معیار کی تربیت فراہم کرنا اور انہیں جدید ترین مہارتوں اور صنعتی شعور کے ساتھ بااختیار بنانا ہے۔ملازمت کے ساتھ ساتھ طلبہ میں کاروباری سوچ اور قیادت کی صلاحیتیں بڑھانا ہمارا مقصد ہے۔ڈاکٹر شاہد نے اس بات پر زور دیا کہ اب وقت آگیا ہے کہ دنیا کی تمام بڑی کمپنیز میں پاکستانیوں کی بڑی تعداد کو مواقع دئے جارہے ہیں۔
سر سید یونیورسٹی کے وائس چانسلر پروفیسر ڈاکٹر افضل حق نے اس اقدام کو سراہتے ہوئے کہا یہ سیشن ہمارے طلبہ کے لیے ترقی اور ملازمتوں کے نئے دروازے کھولے گااور طلبہ کے خوابوں کو حقیقت میں بدلنے کا ذریعہ بنے گا۔عالمی سطح پر کامیابی کے لیے جو رہنمائی اور تربیت درکار ہے، وہ آج انہیں فراہم کی جا رہی ہے۔ ڈاکٹر ظفر شاہد کا وژن اور خدمات قابلِ ستائش ہیں۔
سیشن ان تمام طلبہ اور پیشہ ور افراد کے لیے ایک سنہری موقع ہے جو امریکہ، خاص طور پر سلیکون ویلی میں کیریئر بنانے کے خواہش مند ہیں۔ آئی کوڈ گرو iCodeGuruکے پروگرام سیشن کے اختتام پر سوال و جواب کا سلسلہ بھی ہوا، جس میں طلبہ نے براہ راست ڈاکٹر شاہد سے رہنمائی حاصل کی۔
