اعجاز اسلم کی “کشکول” سے جڑی یادیں

معروف اداکار اعجاز اسلم نے اپنے پہلے ڈرامے ’کشکول‘ سے جڑی پرانی یادیں تازہ کرتے ہوئے مداحوں کے ساتھ ماضی کا ایک جھلک شیئر کی۔ انسٹاگرام پر انہوں نے ’کشکول‘ کی کاسٹ کے ساتھ چند پرانی تصاویر پر مبنی کولاج شیئر کیا اور بتایا کہ یہ ان کے کیریئر کا آغاز تھا، جس میں انہوں نے “روشو” نامی کردار ادا کیا جو دیکھتے ہی دیکھتے مقبول ہوگیا۔

اعجاز اسلم نے لکھا کہ ’کشکول‘ ایک ایسا ڈرامہ تھا جو یوٹیوب یا سوشل میڈیا کے بغیر ہی سپر ہٹ بنا، اس زمانے میں شہرت صرف کارکردگی، مضبوط کہانی اور ناظرین کے تعلق سے حاصل کی جاتی تھی۔

انہوں نے مزید بتایا کہ شوٹنگ شروع ہونے سے قبل ہم نے بار بار ریہرسل کی، جو آج کے دور میں کم دیکھنے کو ملتی ہے۔ ان کا کہنا تھا کہ شوبز کا منظرنامہ اب مکمل طور پر تبدیل ہو چکا ہے، اور اس میں باقی رہنے کے لیے وقت کے ساتھ خود کو بدلنا ضروری ہے، لیکن وہ اس سفر کے آغاز پر ہمیشہ شکر گزار رہیں گے۔