بھارتی فلم انڈسٹری کے معروف اداکار اور فلم ساز عامر خان نے اپنی تازہ ترین فلم “ستارے زمین پر” کو یوٹیوب پر ریلیز کرنے کا فیصلہ کیا ہے۔ انہوں نے ایک پریس کانفرنس کے دوران بتایا کہ یہ فلم یکم اگست سے ان کے آفیشل یوٹیوب چینل
Aamir Khan Talkies
پر دستیاب ہوگی۔
عامر خان نے وضاحت کی کہ ناظرین اس فلم کو 100 روپے ادا کرکے 48 گھنٹوں کے لیے دیکھ سکیں گے۔ یہ فلم تقریباً چھ ہفتے قبل سنیما گھروں میں نمائش کے لیے پیش کی گئی تھی اور باکس آفس پر قابلِ ذکر کامیابی حاصل کر چکی ہے۔
انہوں نے مزید بتایا کہ ان کی پروڈکشن ہاؤس کی دیگر کامیاب فلمیں جیسے دنگل، لگان، جانے تو یا جانے نہ اور تارے زمین پر بھی اسی چینل پر اپلوڈ کی جائیں گی۔ اس کے ساتھ ساتھ ان کا مشہور ٹی وی پروگرام ستیہ میو جیتے بھی اسی پلیٹ فارم کا حصہ بنایا جائے گا۔
عامر خان کا کہنا تھا کہ یہ ماڈل خاص طور پر ان لوگوں کے لیے متعارف کرایا گیا ہے جو دور دراز علاقوں میں رہتے ہیں اور سنیما تک رسائی نہیں رکھتے۔ اس کا مقصد صاف، معیاری اور اشتہارات سے پاک تفریحی مواد فراہم کرنا ہے۔
انہوں نے یہ بھی اعلان کیا کہ نئے فلم سازوں کو بھی اس پلیٹ فارم پر اپنی فلمیں اسی طرز پر ریلیز کرنے کا موقع دیا جائے گا، تاہم اگر کوئی صارف مخصوص وقت میں فلم نہ دیکھ سکے، تو دوبارہ دیکھنے کے لیے پھر ادائیگی کرنا ہوگی۔
یہ بات بھی قابلِ ذکر ہے کہ مذکورہ پریس کانفرنس کے حوالے سے مداحوں میں قیاس آرائیاں تھیں کہ شاید عامر خان اپنی شادی کا اعلان کرنے والے ہیں، مگر انہوں نے سب کو حیران کرتے ہوئے اپنے نئے ڈیجیٹل ماڈل کا اعلان کر دیا۔
