اداکارہ زارا نور عباس کی ایک حالیہ سوشل میڈیا پوسٹ نے مداحوں کی توجہ اپنی جانب مبذول کر لی، جس پر تعریفی کمنٹس اور دلچسپ گفتگو کا سلسلہ جاری ہے۔
زارا نور عباس نے انسٹاگرام پر ایک تصویر شیئر کرتے ہوئے اس کے ساتھ ایک پیغام بھی تحریر کیا، جس میں انہوں نے کہا کہ مشترکہ خاندانی نظام نہ صرف ہماری سماجی روایات کا اہم جز ہے بلکہ جدید دور کی تنہائی اور نفسیاتی الجھنوں کا موثر علاج بھی ثابت ہو سکتا ہے۔
اپنی بات کو آگے بڑھاتے ہوئے زارا نے لکھا کہ ماضی میں خاندانوں کے درمیان محبت اور قربت اتنی گہری تھی کہ لوگ بغیر کسی جھجک کے ایک دوسرے کے گھروں کا رخ کر لیتے، مل بیٹھ کر کھانا کھاتے اور بچوں کی تربیت میں ایک دوسرے کا سہارا بنتے، جس سے زندگی بہت آسان محسوس ہوتی۔
اداکارہ نے آخر میں لکھا: “ہمیں ایک بار پھر اسی نظام کی طرف لوٹنے کی ضرورت ہے۔ مشترکہ خاندان زندہ باد!”
زارا کی اس پوسٹ نے ان کے چاہنے والوں کو نہ صرف جذباتی کر دیا بلکہ سوشل میڈیا پر مشترکہ خاندانی نظام کے حوالے سے ایک مثبت بحث کا آغاز بھی ہو گیا ہے۔ لوگوں نے ان کی سوچ کو سراہا اور ماضی کی خوشگوار یادوں کا ذکر بھی کیا۔
