وفاقی دارالحکومت اسلام آباد میں گاڑیوں کے مالکان کے لیے ایک جدید سہولت متعارف کرائی جا رہی ہے۔ محکمہ ایکسائز اینڈ ٹیکسیشن نے اسلام آباد میں رجسٹرڈ گاڑیوں کو ڈیجیٹل کارڈز جاری کرنے کا فیصلہ کیا ہے۔ اب گاڑیوں کا ریکارڈ موبائل والٹ میں محفوظ رہے گا، اور مالکان کو گاڑی کے کاغذات ساتھ رکھنے کی ضرورت نہیں ہوگی۔
ڈیجیٹل کارڈ مرحلہ وار جاری کیے جائیں گے، جنہیں شہر کے تمام ڈیجیٹل پارکنگ پلازوں سے منسلک کیا جائے گا۔ گاڑی پارک کرنے پر فیس کی ادائیگی ڈیجیٹل کارڈ کے ذریعے ممکن ہوگی، جبکہ چالان کی معلومات بھی اسی کارڈ میں موجود ہوں گی۔
ڈائریکٹر ایکسائز، بلال اعظم کے مطابق، مستقبل میں صرف ڈیجیٹل کارڈز کو ہی اہمیت دی جائے گی۔ اس کے علاوہ اگلے مرحلے میں گاڑیوں کی ملکیت کی منتقلی کا عمل بھی مکمل طور پر آن لائن کر دیا جائے گا۔ بائع اور خریدار گھر بیٹھے بایومیٹرک تصدیق کے ذریعے گاڑی ٹرانسفر کر سکیں گے، اور ایکسائز دفتر جانے کی ضرورت نہیں ہوگی۔
انہوں نے مزید بتایا کہ محکمہ ایکسائز اسلام آباد میں مسلسل ڈیجیٹل نظام متعارف کروا رہا ہے۔ اس سے گاڑیوں کے کاغذات کی حفاظت مزید آسان ہو جائے گی۔ ماضی میں جہاں گاڑیوں کی ملکیت کی شناخت کیلئے “بک” استعمال ہوتی تھی، وہیں بعد میں سمارٹ کارڈز متعارف کروائے گئے، اور اب ڈیجیٹل کارڈز کا نیا باب کھولا جا رہا ہے۔
مزید یہ کہ اسلام آباد میں داخل ہونے والی تمام گاڑیوں پر ایم ٹیگ کی پابندی عائد کی جا چکی ہے۔ بغیر ایم ٹیگ کے کوئی بھی گاڑی شہر میں داخل نہیں ہو سکے گی۔ چیئرمین سی ڈی اے محمد علی رندھاوا کی زیر صدارت ہونے والے اجلاس میں فیصلہ کیا گیا کہ شہر میں جدید ڈیجیٹل پارکنگ سسٹم متعارف کرایا جائے گا، جس میں پارکنگ میٹرز، موبائل ایپ، اور QR کوڈ کے ذریعے فیس کی ادائیگی ممکن ہوگی۔
مزید برآں، شہر میں داخل ہونے اور نکلنے والی گاڑیوں کا باقاعدہ ڈیٹا جمع کیا جائے گا، اور زیادہ رش والی جگہوں پر پارکنگ چارجز بھی بڑھائے جائیں گے، تاکہ ٹریفک کی روانی کو بہتر بنایا جا سکے۔
