وفاقی وزیر برائے منصوبہ بندی، ترقی اور خصوصی اقدامات، احسن اقبال نے کہا ہے کہ پاکستان کی شوبز اور تفریحی صنعت میں بین الاقوامی سطح پر کامیابی حاصل کرنے کی زبردست گنجائش موجود ہے۔
کراچی میں معروف فلم سازوں اور ڈائریکٹرز کے ساتھ منعقدہ ایک راؤنڈ ٹیبل اجلاس میں انہوں نے پاکستانی فلم اور ڈرامہ انڈسٹری کو عالمی معیار کے مطابق ازسرنو فعال کرنے کی ضرورت پر زور دیا۔
احسن اقبال نے خواہش ظاہر کی کہ پاکستانی فلمیں اور ڈرامے نیٹ فلکس، ایمیزون پرائم جیسے عالمی اسٹریمنگ پلیٹ فارمز پر بھی دستیاب ہوں۔ انہوں نے کہا کہ اگرچہ پاکستانی ڈرامے دنیا بھر میں سراہے جاتے ہیں، مگر ان کی بین الاقوامی رسائی محدود ہے، جو افسوسناک ہے۔
انہوں نے فلم انڈسٹری کی سست روی پر بھی تشویش کا اظہار کیا اور کہا کہ سال میں صرف چند فلمیں ریلیز ہوتی ہیں، جو کہ ناکافی ہے۔ انہوں نے ہدایت کاروں اور مصنفین کو مشورہ دیا کہ وہ نئے اور منفرد موضوعات کی تلاش کریں اور یکسانیت سے گریز کریں۔
وفاقی وزیر نے معیشت کی بہتری کے لیے برآمدات پر انحصار بڑھانے پر زور دیتے ہوئے کہا کہ فلم اور ڈرامہ انڈسٹری بھی قومی اقتصادی ترقی میں اہم کردار ادا کر سکتی ہے۔
انہوں نے کہا کہ انڈسٹری سے وابستہ افراد پاکستان کی ثقافت کے سفیر ہیں اور انہیں چاہیے کہ وہ عالمی پلیٹ فارمز پر اپنی موجودگی کو مضبوط کریں تاکہ ملک کا مثبت تاثر اجاگر ہو۔
احسن اقبال نے مزید کہا کہ حکومت کی معاونت سے کھیلوں، فلم اور ڈرامہ کے شعبے میں نمایاں بہتری آئی ہے اور اس ترقی کا تسلسل برقرار رہنا چاہیے۔
اس نشست میں معروف ہدایت کار ندیم بیگ، پروڈیوسر ستیش آنند اور اداکارہ حنا خواجہ بیات بھی شریک تھیں۔
