اسلام آباد کی قائداعظم یونیورسٹی کے ہاسٹل نمبر 6، 8، 9 اور 11 کو منگل کی علی الصبح پولیس اور ہاسٹل انتظامیہ نے مشترکہ کارروائی کرتے ہوئے خالی کرا لیا۔
ذرائع کے مطابق یونیورسٹی کی درخواست پر کارروائی کرتے ہوئے پولیس نے تقریباً 55 سے 60 طلباء کو حراست میں لے کر تھانہ سیکریٹریٹ منتقل کر دیا۔
تاہم اس معاملے پر پولیس حکام نے تاحال کوئی باضابطہ بیان دینے سے گریز کیا ہے۔
یاد رہے کہ یونیورسٹی انتظامیہ کی جانب سے 21 جولائی تک تمام ہاسٹلز خالی کرنے کی ہدایات دی گئی تھیں۔
انتظامیہ کا کہنا ہے کہ 13 جولائی 2025 سے گرمیوں کی تعطیلات کے دوران ہاسٹلز کو عارضی طور پر بند کرنے کا فیصلہ کیا گیا تھا تاکہ سالانہ مرمت اور تزئین و آرائش کا کام مکمل کیا جا سکے۔
انتظامیہ نے وضاحت کی کہ بیشتر طلباء نے احکامات پر عمل کرتے ہوئے ہاسٹلز خالی کر دیے تھے، تاہم کچھ طلباء کو بارہا نوٹس دیے جانے کے باوجود وہ مقامات خالی نہیں کیے گئے، جس کے باعث آج حتمی کارروائی کی گئی۔
یونیورسٹی انتظامیہ کا یہ بھی کہنا ہے کہ اسلام آباد ہائیکورٹ نے بھی اس حوالے سے طلباء کی درخواست مسترد کر دی تھی، جس کے بعد قانون کے مطابق کارروائی کی گئی۔
