بھارتی اداکارہ جینیفر بانسیوال نے مشہور ٹی وی سیریل تارک مہتا کا الٹا چشمہ کے پروڈیوسرز کے خلاف سنگین الزامات عائد کرتے ہوئے کہا ہے کہ انہیں اور دیگر اداکاروں کو ان کی محنت کا پورا معاوضہ نہیں دیا گیا۔
ایک حالیہ انٹرویو میں گفتگو کرتے ہوئے جینیفر نے انکشاف کیا کہ شو چھوڑنے والے متعدد فنکاروں کو ان کی واجب الادا رقوم تاحال ادا نہیں کی گئیں۔ ان کے مطابق یہ مسئلہ کوئی نیا نہیں بلکہ پرانا ہے، جس کا سامنا ماضی میں بھی کئی فنکاروں کو کرنا پڑا ہے۔
انہوں نے بطور مثال بھویا گاندھی کا ذکر کیا، جو شو میں ٹپو کا کردار ادا کرتے تھے۔ جینیفر کا کہنا ہے کہ جب بھویا نے شو چھوڑا، تو اس وقت بھی انہیں ادائیگی کے مسائل درپیش تھے، جو شاید 2017 یا 2018 کے دوران پیش آئے۔
انہوں نے مزید بتایا کہ اداکارہ نیہا مہتا، جنہوں نے انجلی کا کردار نبھایا، اُنہیں بھی مکمل معاوضہ ادا نہیں کیا گیا، حالانکہ وہ شو کو چھوڑ چکی ہیں۔ اگر حالیہ دنوں میں کوئی ادائیگی کی گئی ہو، تو اس کی مصدقہ معلومات ان کے پاس نہیں ہیں۔
جینیفر، جنہوں نے شو میں سوڈی سنگھ کی اہلیہ کا کردار ادا کیا تھا، کا کہنا ہے کہ فی الوقت شو میں کام کرنے والے کئی اداکار صرف مالی مشکلات کی وجہ سے کام پر مجبور ہیں۔ اُن کے بقول، بہت سے فنکار خوف یا دباؤ کی وجہ سے اس بارے میں زبان نہیں کھول پاتے۔
انہوں نے یہ بھی دعویٰ کیا کہ انہیں بعض لوگوں نے خاموش رہنے اور معافی مانگ کر معاملہ ختم کرنے کا مشورہ دیا، لیکن انہوں نے اپنے حق کی خاطر بولنے کا فیصلہ کیا، کیونکہ خاموشی مسائل کا حل نہیں ہے۔
