ریسنگ تھیم پر مبنی ہالی وڈ فلم ایف ون نے چین میں کامیابی کا سفر جاری رکھتے ہوئے باکس آفس پر ایک اور اہم سنگ میل عبور کر لیا ہے۔ اداکار بریڈ پٹ کی اس فلم نے کووڈ کے بعد ان چند ہالی ووڈ فلموں میں جگہ بنائی ہے جو چینی مارکیٹ میں نمایاں بزنس کرنے میں کامیاب رہی ہیں۔
یہ فلم نہ صرف چین بلکہ شمالی امریکا سمیت دیگر عالمی منڈیوں میں بھی شاندار پرفارمنس دکھا رہی ہے۔ ایف ون اب ان چند فلموں کی فہرست میں شامل ہو چکی ہے جنہوں نے عالمی سطح پر 500 ملین ڈالرز سے زائد کا بزنس کیا ہے۔ یہی نہیں، یہ فلم ممکنہ طور پر بریڈ پٹ کے کیریئر کی سب سے بڑی ہٹ فلم بننے جا رہی ہے، جس نے ان کی مشہور فلم ورلڈ وار زیڈ کو پیچھے چھوڑ دیا ہے۔
اس ہفتے کے اختتام تک ایف ون، بریڈ پٹ کی دوسری سب سے زیادہ کمائی کرنے والی فلم بن کر ابھری ہے، جس نے عالمی سطح پر شائقین کو متاثر کیا ہے۔
فلم کے زبردست ریسنگ مناظر اور اعلیٰ معیار کی ساؤنڈ ڈیزائننگ شائقین کو سینما گھروں کی جانب کھینچ رہی ہے، اور سوشل میڈیا پر اسے “اب تک کی بہترین سینما فلم” قرار دیا جا رہا ہے۔
انڈسٹری تجزیہ کاروں کے مطابق فلم نے چین میں اپنے پانچویں ویک اینڈ پر 3 ملین ڈالرز کا بزنس کیا، جب کہ صرف اتوار کو 1.3 ملین ڈالرز کی کمائی ہوئی، جو 5,000 سے زائد اسکریننگز پر مشتمل تھی۔
ہدایتکار جوزف کوسنسکی کی اس فلم نے چین میں باکس آفس پر 50 ملین ڈالرز کا ہدف عبور کر لیا ہے، اور 31 دنوں کے اندر اندر اس کی مجموعی کمائی 51.4 ملین ڈالرز تک پہنچ چکی ہے۔
