حال ہی میں سوشل میڈیا پر ایک ویڈیو وائرل ہوئی جس میں بھارتی سول سروس کے افسران ایک لگژری بس میں سوار عامر خان کے گھر کے احاطے میں داخل ہوتے دکھائی دیے۔ ویڈیو منظرِ عام پر آتے ہی قیاس آرائیوں کا بازار گرم ہو گیا، اور مختلف نظریات گردش کرنے لگے۔
کسی نے اس ملاقات کو خفیہ فلمی منصوبے سے جوڑ دیا، تو کسی نے اسے عامر خان کی لگژری گاڑیوں سے متعلق کسی تکنیکی مسئلے سے تعبیر کیا۔ سوشل میڈیا پر چہ مگوئیاں جاری تھیں کہ آخر معاملہ کیا ہے۔ مگر اب اس ملاقات کی حقیقت سامنے آ چکی ہے، جو توقع سے کہیں زیادہ خوش آئند ہے۔
عامر خان کے ترجمان نے وضاحت کرتے ہوئے بتایا کہ موجودہ بیچ کے آئی پی ایس ٹرینی افسران نے عامر خان سے ملاقات کی خواہش ظاہر کی تھی، جس پر انہوں نے خوش دلی سے انہیں اپنے گھر مدعو کیا۔
ترجمان کے مطابق یہ پہلا موقع نہیں تھا کہ عامر خان نے سول سروس افسران سے ملاقات کی ہو۔ ان کی 1999 کی فلم “سرفروش” میں ادا کیا گیا فرض شناس پولیس افسر کا کردار انہیں سروس میں تربیت حاصل کرنے والے افسران کے لیے ایک مثالی شخصیت بنا چکا ہے۔
عامر خان کئی برسوں سے سول سروس سے وابستہ افسران سے ملاقاتیں کرتے رہے ہیں، جن میں وہ نہ صرف اپنے فلمی تجربات شیئر کرتے ہیں بلکہ حب الوطنی، عوامی خدمت، اور قوم کی تعمیر جیسے اہم موضوعات پر بھی اظہار خیال کرتے ہیں۔
