چینی کے ممکنہ بحران پر قابو پانے کے لیے حکومت نے کل شوگر ملز ایسوسی ایشن کے نمائندوں کو طلب کر لیا۔
اجلاس وفاقی وزیر رانا تنویر کی صدارت میں ہو گا، جس میں چینی کی قیمتوں کے معاہدے پر عمل درآمد کا جائزہ لیا جائے گا۔
اجلاس میں سیکریٹری انڈسٹریز اور چیئرمین ایف بی آر شریک ہوں گے، ڈی جی ایف آئی اے اور چاروں صوبوں کے کین کمشنرز بھی شرکت کریں گے۔
لاہور میں چینی کی مرکزی مارکیٹ اکبری منڈی سے چینی غائب ہے، ڈیلرز کا اسٹاک ختم ہونے کو ہے اور چند روز میں چینی کے بحران کا خطرہ ہے۔
ڈیلرز ایسوسی ایشن کا کہنا ہے کہ شوگر ملوں سے 165 روپے کلو کے حکومتی نرخوں پر چینی فراہم نہیں کی جا رہی، 165 روپے کلو کے حساب سے چینی ملے گی تو ہی حکومتی نرخ پر بیچیں گے۔
وفاقی حکومت کی جانب سے چینی کی ایکسپورٹ کی اجازت ملنے کے بعد چینی کی ایکس مل قیمت 165روپے فی کلو مقرر کی گئی ہے۔
جس میں ہر ماہ 2 روپے اضافہ ہونا ہے، یعنی آج سے 4 دن بعد چینی کی ایکس مل قیمت میں 2 روپے بڑھنے ہی ہیں۔
=============
ڈیلرز اور شوگر ملز مالکان کا چینی خریدو فروخت کا تنازع حل نہ ہو سکا
ڈیلرز اور شوگر ملز مالکان کا چینی خریدو فروخت کا تنازع حل نہ ہو سکا۔
جیو نیوز سے گفتگو کرتے ہوئے شوگر ڈیلرز ایسوسی ایشن کے رہنما سہیل ملک نے کہا کہ شوگر ڈیلرز کو آج بھی چینی 165 روپے پر نہیں مل سکی، بازار میں آج بھی چینی کی سپلائی معطل رہے گی۔
انہوں نے کہا کہ شوگر ملز مالکان نے وزارت سے مل کر چینی ایکسپورٹ کرا دی ہے، اربوں روپے کا منافع شوگر ملز مالکان ہڑپ کر گئے، اب چینی کا بحران آیا تو ذمے دار صرف ڈیلرز کو قرار دیا گیا۔
ان کا کہنا تھا کہ شوگر ڈیلرز اس وقت روپوش ہو چکے ہیں۔
ذرائع کے مطابق شوگر ملز مالکان بحران پر براہ راست مؤقف دینے سے گریز کر رہے ہیں۔
شوگر ملز کے ذرائع نے کہا کہ چینی اسٹاک کی کمی نہیں ہمارا مؤقف حکومت کو معلوم ہے۔
==================
کراچی: چینی کی ریٹیل قیمت 173 روپے فی کلو مقرر
کمشنر کراچی نے چینی کی نئی سرکاری قیمت مقرر کر دی۔
کراچی سے جاری کیے گئے نوٹیفیکیشن کے مطابق چینی کی نئی ہول سیل قیمت 170 اور ریٹیل قیمت 173 روپے فی کلو مقرر کی گئی ہے۔
احکامات میں کہا گیا ہے کہ نوٹیفیکشن پر ہول سیلرز، ریٹیلر اور ڈیپارٹمنٹل اسٹورز سختی سے عمل کریں۔
کمشنر کراچی نے کہا ہے کہ زائد قیمت پر چینی فروخت کرنے والوں کے خلاف قانونی کارروائی ہو گی۔
====================
اسلام آباد کے بازار چینی کو ترس گئے، شہری پریشان
وفاقی دارالحکومت اسلام آباد میں چینی کی قلت ہو گئی ہے، دکانداروں کا کہنا ہے کہ چینی کا سرکاری ریٹ 172 روپے فی کلو ہے جبکہ منڈی سے چینی 178 سے 188 روپے کی مل رہی ہے۔
دکانداروں کے مطابق پرائس مجسٹریٹ کی گرفتاریوں سے تنگ آ چکے ہیں، اب چینی نہیں رکھیں گے۔
اس صورتحال کے باعث اسلام آباد کے بازار چینی کو ترس گئے اور 4 دن سے چینی دستیاب نہیں۔
حکومت نے چینی کا سرکاری ریٹ 172 روپے فی کلو مقرر کیا لیکن اس پر عمل درآمد نہ ہو سکا، دکانداروں کے مطابق جب خرید مہنگی ہے تو سستی چینی کیسے بیچیں؟
دوسری جانب دکانوں کے چکر لگانے والے شہری کہتے ہیں کہ چینی بنیادی ضرورت ہے لیکن مل نہیں رہی۔
عوام کا کہنا ہے کہ جو ملک چینی کی پیداوار میں خود کفیل ہو وہیں چینی نہ ملے تو پھر دیگر اشیاء پر کیا گلا کریں؟ حکومت اس ضمن میں شفاف طریقہ کار بنائے
